ডিজিটেল ডেস্কঃ আজি পুৱা বলৰামপুৰ জিলাৰ ফুলৱাৰিয়া বাইপাছত সংঘটিত হয় এক বৃহৎ পথ দুৰ্ঘটনা।
প্ৰায় ২:১৫ বজাত সোণাউলীৰ পৰা দিল্লী অভিমুখী এখন যাত্ৰীবাহী বাছে এখন কাৰ্গো ট্ৰাকৰ সৈতে মুখামুখি সংঘৰ্ষত লিপ্ত হয়। ইয়াৰ প্ৰভাৱ ইমানেই ভয়াৱহ আছিল যে বাছখনে নিয়ন্ত্ৰণ হেৰুৱাই পথৰ কাষত বাগৰি পৰে আৰু কেইছেকেণ্ডমানৰ ভিতৰতে জুইত জাহ যায়।
দুৰ্ঘটনাটোৰ তথ্য লাভ কৰাৰ লগে লগে বৃহৎ আৰক্ষী বাহিনী আৰু অগ্নিনিৰ্বাপক বাহিনীৰ দলৰ সৈতে আৰক্ষী অধীক্ষক বলৰামপুৰ ঘটনাস্থলীত উপস্থিত হয়।
নেপালৰ পৰা দিল্লী অভিমুখে গৈ আছিল বাছখন
খবৰ অনুসৰি, সোণাউলীৰ পৰা দিল্লী অভিমুখে গৈ থকা UP22 AT 0245 নম্বৰৰ বাছখনে ফুলৱাৰিয়া ছেক্সনৰ সমীপত সন্মুখৰ পৰা অহা UP21 DT 5237 নম্বৰৰ ট্ৰাকৰ সৈতে খুন্দা মাৰে। সংঘৰ্ষৰ লগে লগে বাছখনত অগ্নিকাণ্ড সংঘটিত হোৱাৰ ফলত যাত্ৰীসকল আতংকিত হৈ পলায়ন কৰে। থিতাতে তিনিজন যাত্ৰীৰ মৃত্যু হোৱাৰ বিপৰীতে ২৪জন আহত হয়।
৫জন যাত্ৰীৰ অৱস্থা সংকটজনক
দুৰ্ঘটনাটোৰ তথ্য লাভ কৰাৰ লগে লগে আৰক্ষী আৰু যান-বাহন আৰক্ষীয়ে উদ্ধাৰ অভিযান আৰম্ভ কৰে। লগে লগে আহতসকলক বলৰামপুৰৰ যুটীয়া জিলা চিকিৎসালয়লৈ প্ৰেৰণ কৰা হয়। পাঁচজন যাত্ৰীৰ অৱস্থা সংকটজনক বুলি জানিব পৰা গৈছে আৰু প্ৰাথমিক চিকিৎসাৰ পিছত বাহৰেইচৰ মেডিকেল কলেজলৈ প্ৰেৰণ কৰা হৈছে। আৰক্ষী আৰু অগ্নিনিৰ্বাপক বাহিনীৰ দলে যথেষ্ট প্ৰচেষ্টা চলাই বাছ আৰু ট্ৰাকখনৰ জুই নিয়ন্ত্ৰণলৈ আনে।
ফুলৱাৰিয়া বাইপাছত যান-জঁট
এই দুৰ্ঘটনাৰ পিছতে ফুলৱাৰিয়া বাইপাছৰ যাতায়ত সাময়িকভাৱে বন্ধ হৈ পৰে। আৰক্ষীয়ে দুয়োখন বাহন পথৰ পৰা আঁতৰাই যাতায়ত পুনৰ স্থাপন কৰে। প্ৰত্যক্ষদৰ্শীয়ে জনোৱা মতে, সংঘৰ্ষৰ পিছত বাছখনৰ পৰা তীব্ৰ বিস্ফোৰণ ঘটে ।
বিজনুৰত তিনিজন মৃত
বিজনুৰৰ শ্বেৰকোট ৰাষ্ট্ৰীয় ঘাইপথত সংঘটিত হয় এক ভয়ংকৰ পথ দুৰ্ঘটনা। তীব্ৰবেগী ডিচিএমৰ এখন বাহনে এখন পিকআপ ভ্যান আৰু এখন মটৰ চাইকেলত খুন্দা মাৰে। দুৰ্ঘটনাটোত তিনিজন লোকৰ কৰুণ মৃত্যু হয়, ঘটনাস্থলীত শোকৰ কান্দোন আৰু চিঞৰ-বাখৰ। ঘাইপথটো একমুখী পথ হোৱাৰ বাবেই সংঘটিত হয় এই শোকাৱহ দুৰ্ঘটনা। শ্বেৰকোট আৰক্ষী থানাৰ অন্তৰ্গত ৰাষ্ট্ৰীয় ঘাইপথৰ মুবাৰকপুৰ কুণ্ডাৰ সমীপত সংঘটিত হয় এই ঘটনা। আৰক্ষীয়ে তদন্ত অব্যাহত ৰাখিছে।
Continue Reading
