ডিজিটেল ডেস্ক : ৰে'ল যাত্ৰীসকলৰ বাবে সুখবৰ । যাত্ৰীসকলে এতিয়া ৰে’লত যাত্ৰা কৰাৰ সময়তো নগদ ধন উলিয়াব পাৰিব। যাত্ৰীসকলে আৰু নগদ ধনৰ সমস্যাৰ সন্মুখীন নহ’ব, কিয়নো এতিয়াৰ পৰা ৰে’লত স্থাপন কৰা হ’ব এটিএম ।
মহাৰাষ্ট্ৰৰ মনমদ-চি এছ এম টি পঞ্চৱতী এক্সপ্ৰেছত প্ৰৱৰ্তন কৰা হৈছে "এটিএম অন হুইলছ"ৰ সুবিধা। এই পদক্ষেপৰ লক্ষ্য হৈছে যাত্ৰীসকলক যাতায়তৰ সময়ত নগদ ধন প্ৰদান কৰা আৰু ৰে’লৱেৰ ভাড়াবিহীন ৰাজহ বৃদ্ধি কৰা।
উক্ত ৰে’লখনত পাইলট ভিত্তিত এই সুবিধা ৰূপায়ণ কৰা হৈছে। বিক্ৰমশিলা এক্সপ্ৰেছ, এলটিটি এক্সপ্ৰেছ, আং এক্সপ্ৰেছ, আৰু অমৰনাথ এক্সপ্ৰেছকে ধৰি এই অংশৰ মাজেৰে যোৱা আন আন দীৰ্ঘ দূৰত্বৰ ৰে’লসমূহতো এই সুবিধা কাৰ্যকৰী কৰা হ’ব।
যাত্ৰীসকলক যাতায়তত নগদ ধন যোগান ধৰাৰ লগতে ৰে’লৱেৰ ভাড়াবিহীন ৰাজহ বৃদ্ধিৰ বাবে এই এটিএম অন হুইলছৰ সুবিধা প্ৰৱৰ্তন কৰা হৈছে। ডিজিটেল ইণ্ডিয়াৰ দিশত ৰে’লৱেই এক বৈপ্লৱিক পদক্ষেপ গ্ৰহণ কৰিছে। এই এটিএমটো ৰে’লৰ মিনি পেণ্ট্ৰি ৰূপান্তৰিত কৰি স্থাপন কৰা হৈছে।
ইয়াক ৰবৰৰ পেড আৰু বল্টৰ সহায়ত কম্পনৰ পৰা ৰক্ষা কৰা হৈছে। সুৰক্ষাৰ মানদণ্ড পূৰণ কৰাটো নিশ্চিত কৰিবলৈ দুটা অগ্নিনিৰ্বাপক যন্ত্ৰও স্থাপন কৰা হৈছে। এই পদক্ষেপে যাত্ৰীসকলক যাত্ৰাৰ সময়ত নগদ ধনৰ প্ৰয়োজন হ’লে যথেষ্ট সকাহ প্ৰদান কৰিব।
ৰেলৱেৰ বিষয়াসকলৰ মতে, উন্নত ভাৰত ২০৪৭ৰ দৃষ্টিভংগীৰ লগত খাপ খুৱাই আধুনিকীকৰণ আৰু উদ্ভাৱনৰ দিশত অহৰহ কাম কৰি আছে। আধুনিক ষ্টেচন, অত্যাধুনিক ৰেল, আৰু নতুন নিৰাপত্তা ব্যৱস্থা এই ৰূপান্তৰৰ চিহ্ন।
ষ্টেচনত টিকট কাউণ্টাৰত QR ক’ড উপলব্ধ হ’লেও ৰে’লৰ টিকট পৰীক্ষাকাৰীৰ সৈতে এই সেৱা উপলব্ধ নহয়। যদি কোনো যাত্ৰী চলন্ত ৰে’লত টিকট নোহোৱাকৈ ধৰা পৰে আৰু জৰিমনা পৰিশোধ কৰিবলৈ নগদ ধন নাথাকে তেন্তে ই কেতিয়াবা সমস্যাৰ সৃষ্টি কৰিব পাৰে। এটিএম উপলব্ধ হ’লে নগদ ধন উলিয়াই জৰিমনা ভৰিব পাৰিব।
মালদা সংমণ্ডলৰ পি আৰ অ’ ৰাছৰাজ মাজীয়ে উল্লেখ কৰে যে মনমদ-চি এছ এম টি পঞ্চৱতী এক্সপ্ৰেছত প্ৰথমবাৰৰ বাবে পাইলট ভিত্তিত এ টি এম অন হুইলছৰ সুবিধা প্ৰৱৰ্তন কৰা হৈছে। এই পৰীক্ষা সফল হ’লে আন ৰে’লতো এই সুবিধা কাৰ্যকৰী কৰা হ’ব।
Continue Reading
