ডিজিটেল ডেস্কঃ কোনো ৰাজনৈতিক দলৰে বিশ্বাসী হ’ব পৰা নাই বদৰুদ্দিন আজমল৷অসমৰ ৰাজনীতিত নিজকে কিংমেকাৰ আখ্যা দিয়া আজমল এতিয়া নিসংগ৷সেই নিসংগতাই আজমলক এতিয়া ফ্ৰাষ্টটেডেত কৰি তুলিছে৷আজি পুনৰ ৰাজ্যসভাৰ বাহিৰত মোদীবন্দনাত ব্ৰতী হৈ পৰিছে আজমল৷
দিল্লীত অনুষ্ঠিত হ’বলগীয়া বিৰোধী মিত্ৰজোঁটৰ (ইণ্ডিয়া)ৰ বৈঠকলৈ নিমন্ত্ৰণ নকৰাৰ বাবে কংগ্ৰেছক লৈ আক্ৰমণাত্মক হৈ পৰে অল ইণ্ডিয়া ইউনাইটেড ডেম’ক্ৰেটিক ফ্ৰণ্টৰ মুৰব্বী বদৰুদ্দিন আজমলে। বিৰোধী ঐক্যৰ বাবে কৰা প্ৰচেষ্টা ব্যৰ্থ হোৱা বুলিও আজমলে উল্লেখ কৰে।
সংবাদ সংস্থা এএনআইৰ সৈতে হোৱা কথা-বতৰাত বদৰুদ্দিন আজমলে কয় যে “বিৰোধী মিত্ৰজোঁট ‘ইণ্ডিয়া’ৰ বৈঠকলৈ মোক নিমন্ত্ৰণ কৰা হোৱা নাছিল। কংগ্ৰেছে অকলে ছত্তীশগড়, ৰাজস্থান আৰু মধ্যপ্ৰদেশত নিৰ্বাচনত অৱতীৰ্ণ হৈছিল আৰু ফলাফল ওলাইছে। এনে পৰিস্থিতিত বিৰোধী ঐক্যৰ প্ৰচেষ্টা ব্যৰ্থ হৈছে। প্ৰধানমন্ত্ৰী মোদীয়ে সকলোৰে উন্নয়নৰ কথা কয়, কিন্তু কংগ্ৰেছে কিয় নকৰে?”
কংগ্ৰেছৰ সভাপতি মল্লিকাৰ্জুন খৰ্গেৰ কাৰ্যালয়ৰ সহযোগী তথা কংগ্ৰেছ কৰ্মী সমিতিৰ স্থায়ী আমন্ত্ৰিত সদস্য গুৰদ্বীপ সপ্পলে কয় যে এতিয়া ৬ ডিচেম্বৰৰ সন্ধিয়া ইণ্ডিয়া এলায়েন্সৰ সংসদীয় দলৰ নেতাসকলৰ ‘সমন্বয় সভা’ অনুষ্ঠিত হ’ব৷
শেহতীয়াকৈ মধ্যপ্ৰদেশ, ছত্তীশগড় আৰু ৰাজস্থানৰ বিধানসভা নিৰ্বাচনত কংগ্ৰেছে পৰাজয়ৰ পাছত ‘ইণ্ডিয়া’ মিত্ৰজোঁটৰ একাংশ গঠনমূলক দলে কংগ্ৰেছক লৈ প্ৰশ্ন উত্থাপন কৰে। বিহাৰৰ মুখ্যমন্ত্ৰী নীতিশ কুমাৰৰ জে ডি ইউয়ে কয় যে কংগ্ৰেছে "ইণ্ডিয়া" মিত্ৰজোঁটৰ অংশীদাৰৰ সৈতে কোনো ধৰণৰ সমন্বয় নোহোৱাকৈ অকল মধ্যপ্ৰদেশ, ৰাজস্থান আৰু ছত্তীশগড়ৰ বিধানসভা নিৰ্বাচনত প্ৰতিদ্বন্দ্বিতা কৰি ভুল কৰিলে।এতিয়ালৈকে ইণ্ডিয়া এলায়েন্সৰ তিনিখন বৈঠক পাটনা, বেংগালুৰু আৰু মুম্বাইত অনুষ্ঠিত হৈছে। শেহতীয়াকৈ মুম্বাইত মিত্ৰজোঁটৰ গঠনকাৰী দলসমূহৰ নেতাসকলৰ বৈঠকত মিত্ৰজোঁটৰ ভৱিষ্যত কাৰ্যসূচীৰ ৰূপৰেখা প্ৰস্তুত কৰিবলৈ ১৪ জনীয়া সমন্বয় সমিতি গঠন কৰা হয়।
Continue Reading
