ডিজিটেল ডেস্ক: ৰাজ্যিক বিজেপিত প্ৰভাৱ কমিছে আঙুৰলতা ডেকাৰ৷ সৌ সিদিনালৈ ৰাজ্যৰ ৰাজনীতিত দপদপাই থকা আঙুৰলতাৰ সক্ৰিয়তা নোহোৱা হৈছে বিজেপিৰ ভিতৰচ’ৰাত৷ এগৰাকী অভিনেত্ৰী হিচাপে প্ৰতিষ্ঠিত আঙুৰলতা ডেকাই বিজেপিৰ জৰিয়তে আৰম্ভ কৰিছিল ৰাজনৈতিক কেৰিয়াৰ৷
২০১৬ত সৰ্বানন্দ সোণোৱাল নেতৃত্বাধীন বিজেপি চৰকাৰৰ বিধায়িকা হিচাপে কাৰ্যনিৰ্বাহ কৰিছিল আঙুৰলতা ডেকাই৷ বটদ্ৰৱা সমষ্টিত বিজেপি প্ৰাৰ্থী হিচাপে আঙুৰলতা ডেকাই লাভ কৰিছিল ৪৬,৩৪৩টা ভোট৷ আৰু নিকট প্ৰতিদ্বন্দ্বী কংগ্ৰেছৰ গৌতম বৰাই লাভ কৰিছিল ৩৮,৪৫৮টা ভোট৷
কিন্তু, হিমন্ত বিশ্ব শৰ্মা চৰকাৰৰ অংশীদাৰ হ’ব নোৱাৰিলে বিজেপি নেত্ৰীগৰাকীয়ে৷ ২০২১ৰ নিৰ্বাচনত আঙুৰলতাই লাভ কৰে ৫১,৪৫৮টা ভোট আৰু কংগ্ৰেছৰ শিৱামণি বৰাই লাভ কৰে ৮৪,২৭৮টা ভোট৷
বৰ্তমান ৰাজ্যিক বিজেপিৰ মহিলা মৰ্চাৰ সভানেত্ৰী হিচাপে কাৰ্যনিৰ্বাহ কৰি থকা আঙুৰলতা ডেকাৰ শেহতীয়াকৈ সন্ধান নাই ৰাজ্যৰ ৰাজনৈতিক প্ৰেক্ষাপটত৷ লোকসভা নিৰ্বাচনলৈ মাত্ৰ দুমাহ বাকী থকা সময়ত আঙুৰলতাৰ এই অসক্ৰিয়তা বিশেষভাৱে লক্ষ্যণীয় হৈ পৰিছে৷
তদানীন্তন সোণোৱাল চৰকাৰৰ আটাইতকৈ ক্ষমতাশালী মহিলা নেত্ৰী আছিল আঙুৰলতা ডেকা৷ অইন বিজেপি নেত্ৰী নিষ্প্ৰভ হৈ পৰিছিল আঙুৰলতাৰ ৰাজনৈতিক চাতুৰ্যৰ তুলনাত৷ গুৱাহাটী লোকসভা সমষ্টিত বিজেপিৰ ভাবী প্ৰাৰ্থী হিচাপেও নাম চৰ্চিত হৈছিল আঙুৰলতাৰ৷
আৰু অতি সম্প্ৰতি নিৰ্বাচনৰ প্ৰাকমুহূৰ্তত প্ৰাৰ্থিত্বৰ দৌৰৰ পৰাও প্ৰস্থান কৰিছে এসময়ৰ শক্তিশালী বিধায়িকাগৰাকীয়ে৷
দিছপুৰৰ বাহিৰে-ভিতৰে চলা চৰ্চা অনুসৰি অচিৰেই সলনি হ’ব আঙুৰলতা ডেকাৰ পদ৷ মহিলা মৰ্চাৰ ৰাজ্যিক সভানেত্ৰী পদৰ পৰাও অপসাৰিত হ’ব পাৰে আঙুৰলতা ডেকা৷
খবৰ অনুসৰি ৰাজ্যিক বিজেপিৰ মহিলা মৰ্চাৰ সভানেত্ৰীৰূপে স্থলাভিষিক্ত হ’ব পাৰে পূৰৱী ৰায় অথবা স্বপ্না বণিয়া৷ উল্লেখযোগ্য যে ৯ আৰু ১০ ছেপ্টেম্বৰত গুৱাহাটীত বিজেপিৰ ৰাষ্ট্ৰীয় মহিলা মৰ্চাৰ কেন্দ্ৰীয় কাৰ্যনিৰ্বাহক সভা অনুষ্ঠিত কৰিছিল আঙুৰলতা ডেকাই৷ আৰু তাৰ পাছৰ পৰাই অতি নীৰৱে আৰু ৰহস্যজনকভাৱে ৰাজ্যৰ ৰাজনীতিত কমি গৈছে আঙুৰলতা ডেকাৰ সক্ৰিয়তা আৰু প্ৰভাৱ৷
Continue Reading
