ডিজিটেল ডেস্কঃ যুদ্ধৰ বিভীষিকাত স্তব্ধ পৃথিৱী। যুদ্ধৰ নৃশংসতাই প্ৰাণ কাঢ়িছে অনেক নীৰিহ লোকৰ, নিথৰুৱা হৈছে জনসাধাৰণ। ২০২৩ চনৰ ৭ অক্টোবৰৰ পাছত সূচনা হোৱা ইজৰাইল-হামাছৰ যুদ্ধত এতিয়ালৈকে ইজৰাইলে ৪৬,০০০তকৈ অধিক পেলেষ্টাইনৰ নাগৰিকক হত্যা কৰিছে।
গাজাৰ স্বাস্থ্য মন্ত্ৰীয়ে বৃহস্পতিবাৰে এই কথা সদৰী কৰি কয় যে ১৫ মাহ ধৰি চলি থকা এই সংঘৰ্ষৰ এতিয়ালৈকে অন্ত পৰাৰ কোনো সম্ভাৱনা নাই।
স্বাস্থ্য মন্ত্রীজনে কয় যে হামাছৰ বিৰুদ্ধে চলাই থকা আক্রমণত ইজৰাইলে মুঠ ৪৬,০০৬জন পেলেষ্টাইনৰ নাগৰিকক হত্যা কৰিছে আৰু ১,০৯,৩৭৮ জন লোক আহত হৈছে।
ইজৰাইলৰ আক্ৰমণত নিহতসকলৰ আধা সংখ্যকেই হৈছে শিশু আৰু মহিলা। আনহাতে,ইজৰাইলৰ সেনাই কয় যে তেওঁলোকে গাজাত আক্ৰমণ কৰি ১৭,০০০তকৈ অধিক হামাছৰ সন্ত্রাসবাদীক নিহত কৰিছে। সন্ত্রাসবাদীবিলাকে আবাসিক এলেকাৰ পৰা কার্য সম্পাদন কৰাৰ বাবে আৰু ইজৰাইলৰ আক্ৰমণত অসামাৰিক লোক নিহত হোৱাৰ বাবে হামাছকে দোষাৰোপ কৰে ইজৰাইলে।
তেওঁলোকে অসামৰিক লোকক আক্রমণ কৰাৰ পৰা বিৰত থাকিবলৈ চেষ্টা কৰে বুলি ইজৰাইলী সেনাই সদৰী কৰে। উল্লেখযোগ্য যে ইজৰাইলৰ আক্ৰমণত গাজাৰ বহুতো অঞ্চল খণ্ড-বিখণ্ড হৈ পৰিছে আৰু গাজাৰ ২.৩ মিলিয়ন লোকৰ ভিতৰত ৯০ শতাংশ লোকেই স্থানচ্যুত হৈছে।
