৬০০সংখ্যক টেষ্ট খেলিব ভাৰতে; ১৫ আগষ্টত শ্ৰীলংকাৰ গালেত ৰচনা হ’ব ইতিহাস

ডিজিটেল ডেস্ক: শ্রীলংকাৰ বিৰুদ্ধে গালেত ১৫ আগষ্টৰ পৰা খেলিবলগীয়া টেষ্টখন ভাৰতৰ বাবে ঐতিহাসিক হ'ব। ভাৰতে গালেত নিজৰ ৬০০সংখ্যক টেষ্টত অৱতীৰ্ণ হ'ব। ৬০০সংখ্যক টেষ্ট খেলা ভাৰত এছিয়াৰ প্ৰথমখন আৰু বিশ্বৰ তৃতীয়খন দেশ। ভাৰতৰ আগতে ইংলেণ্ড আৰু অষ্ট্ৰেলিয়াই ছয় শতাধিক টেষ্ট মেচ খেলিছে। ইংলেণ্ডে এতিয়ালৈকে সর্বাধিক ১০৯৭খন আৰু ইয়াৰ পাছতে অষ্ট্ৰেলিয়াই ৮৮২খন টেষ্ট খেলিছে। ভাৰতে প্রথম টেষ্ট খেলিছিল ১৯৩২ চনত। 

ভাৰতৰ প্ৰথম টেষ্টৰ অধিনায়ক আছিল চি কে নাইডু। ১৯৩২ চনৰ পৰা ২০২৬ চনলৈ এই ৯৪ বছৰীয়া যাত্ৰাত ভাৰতীয় দলক ৩৮জন অধিনায়কে নেতৃত্ব দিছে। গালেত ৬০০ সংখ্যক টেষ্টত ভাৰতীয় দলক নেতৃত্ব দিব শুভমন গীলে। ভাৰতৰ বাবে হতাশাজনক দিশটো হ'ল এতিয়ালৈকে খেল ৫৯৯খন টেষ্টত যিমানসংখ্যকত জয়ী হৈছে, তাতকৈ অধিকত পৰাজিত হৈছে। ভাৰতে ১৮৬খন টেষ্টত জয়ী হৈছে আৰু ১৮৮খনত পৰাজিত হৈছে। ভাৰতৰ জয়ৰ শতকৰা হাৰ হ'ল ৩১.১৩। 

শুভমনৰ নেতৃত্বত ভাৰতে এতিয়ালৈকে ৯খন টেষ্টৰ ৫খনত জয়ী আৰু ৩খনত পৰাজিত হৈছে। এখন ড্র হৈছে। মন কৰিবলগীয়া যে ভাৰতে শ্রীলংকাৰ বিৰুদ্ধে বিগত ৬খন টেষ্টৰ এখনতো পৰাজিত হোৱা নাই। সেয়েহে গালেত এই ঐতিহাসিক মেচখন ভাৰতীয় দলে জয়েৰে স্মৰণীয় কৰি ৰাখিব বুলি আশা কৰা হৈছে।

উৎস : দৈনিক জনমভূমি