ইণ্ডিয়া মিত্ৰজোঁটৰ ব্যাপক তৎপৰতাৰ মাজতে নিস্ক্ৰিয়তাৰ কলীয়া ডাৱৰৰ মাজত প্ৰদেশ কংগ্ৰেছ

যদি সামগ্ৰিকভাৱে ৰাষ্ট্ৰীয় আৰু ৰাজ্যিক দুয়োটা প্ৰেক্ষাপট উনুকিয়াই চাওঁ তেন্তে আমাৰ সন্মুখত কেইটিমান বৃহৎ বিষয়ে আত্মপ্ৰকাশ কৰে৷যি সমূহৰ ভিতৰত মণিপুৰৰ প্ৰসংগ,হিণ্ডেনবাৰ্গৰ প্ৰতিবেদন,দেশৰ বৰ্ধিত ঋণৰ বোজা,কৃষকৰ প্ৰসংগ,মূল্যবৃদ্ধি,ছয় জনগোষ্ঠীৰ জনজাতিকৰণ,অসম চুক্তিৰ আক্ষৰিক ৰূপায়ণ,আলফা প্ৰসংগ আদি অন্যতম৷কিন্তু এইসমূহ বিষয়ক লৈ বৰ্তমান কি স্থিতিত আছে ভূপেন বৰা নেতৃত্বাধীন অসম প্ৰদেশ কংগ্ৰেছ সেয়া এক পৰ্বতসম প্ৰশ্নৰূপে ঠিয় দিছে৷

সাম্প্ৰতিক পৰিস্থিতিৰ দাবীক উপেক্ষা কৰি স্বৰ্ণমহলৰ কল্পনা কৰাটো এক অবাস্তৱ কথা৷সেই কথাক সময়ে সদায় নস্যাৎ কৰিব কিন্তু হাত সাবটি পৰিস্থিতিক ধিয়াই বহি থকাজনকো অথচ সময়ে ক্ষমা নকৰে৷শেহতীয়াকৈ সংসদৰ মজিয়াত বিৰোধী নেতা গৌৰৱ গগৈৰ নাতিদীৰ্ঘ ভাষণে ভাৰতৰ ৰাজনীতিত এক বৃহৎ আৰু অপ্ৰত্যাশিত প্ৰভাৱ পেলোৱাৰ মাজতে অসমত মুখ্যমন্ত্ৰী ড° হিমন্ত বিশ্ব শৰ্মাই গৌৰৱ গগৈক আক্ৰমণ কৰা দেখা গ’ল কিন্তু নীৰৱ দৰ্শক হৈ ৰ’ল প্ৰদেশ কংগ্ৰেছৰ সভাপতি ভূপেন বৰা৷বিজেপি নেত্ৰী ইন্দ্ৰাণী তহবিলদাৰৰ স্ব-নিধনৰ পাছত বিজেপিৰ ৰাজ্যিক নেতৃত্বৰ প্ৰতি বহু প্ৰশ্নচিহ্নৰ অৱতাৰণা হ’ল তথাপিও মৌন হৈ ৰ’ল ভূপেন বৰা৷কাৰ নিৰ্দেশত ভূপেন বৰাৰ এই কৌশলগত মৌনতা?সেই প্ৰশ্ন অসমৰ সচেতন জনগণৰ মগজুত উদয় হৈছে৷যোৱা ১৫ আগষ্ট তাৰিখে ঐতিহাসিক অসম চুক্তি স্বাক্ষৰ হোৱা  ৩৮ টা বছৰ সম্পূৰ্ণ হ’ল৷এই ৩৮ টা বছৰত প্ৰকৃততে অসমীয়াই ভাষিক,সাংস্কৃতিক,ৰাজনৈতিক  অধিকাৰ পালেনে?বৰ্তমান শাসন কৰা চৰকাৰখনৰ অসম চুক্তি ৰূপায়ণ বাবে লোৱা পদক্ষেপৰ অগ্ৰগতি কিমান?এইসমূহ প্ৰশ্নৰ উত্থাপন ভূপেন বৰাই কৰা পৰিলক্ষিত হ’লনে নহ’ল সেয়া সকলোৰে সন্মুখত জলজলপটপটকৈ স্পষ্ট হৈ পৰিছে৷