ডিজিটেল ডেস্কঃ ভোজপুৰী অভিনেত্ৰী আকাংক্ষা দুবেৰ মৃত্যুকলৈ এতিয়া প্ৰতিক্ৰিয়াৰ সৃষ্টি হৈছে৷ আৰক্ষীৰ মতে অভিনেত্ৰীগৰাকীৰ মৃত্যুৰ সৈতে হত্যাৰ কোনো যোগসূত্ৰ পোৱা হোৱা নাই৷আকাংক্ষা দুবেৰ মৃতদেহ হোটেলৰ কোঠাত ওলমি থকা অৱস্থাত উদ্ধাৰ হৈছিল৷
বাৰাণসীৰ অতিৰিক্ত আৰক্ষী আয়ুক্ত সন্তোষ সিঙে এখন সংবাদমেলত কয় যে আকাংক্ষা দুবেই আত্মহত্যা কৰাৰ পূৰ্বে ইনষ্টাগ্ৰামত কান্দোনৰ ভিডিঅ’ এটা দিছিল৷ বাৰাণসীত হোটেলৰ কোঠাত আকাংক্ষাৰ মৃতদেহ ওলমি থকা অৱস্থাত পোৱা গৈছিল। অভিনেত্ৰীগৰাকী এখন নতুন ছবিৰ দৃশ্যগ্ৰহণৰ বাবে তালৈ গৈছিল। জানিব পৰা মতে ছবিখনৰ মেকআপ শিল্পীজনে দৃশ্যগ্ৰহণৰ বাবে আকাংক্ষাক মাতিবলৈ গৈছিল। তেঁৱেই অভিনেত্ৰীগৰাকীৰ ওলমি থকা শৰীৰটো প্ৰথমে দেখিছিল।
ইফালে, ছ'চিয়েল মিডিয়াত আকাংক্ষাৰ কেইবাটাও ভিডিঅ' ভাইৰেল হৈ পৰিছে। সেইবোৰৰ এটাত ২৫ বছৰীয়া অভিনেত্ৰীগৰাকীক মুখত হাত দি কান্দি থকা দেখা গৈছে৷ দাবী কৰা হৈছে যে ভিডিঅ'টো আকাংক্ষাৰ মৃত্যুৰ আগনিশাৰ। অভিনেত্ৰীগৰাকী এটা পাৰ্টিৰ পৰা হোটেলৰ কোঠালৈ উভতি আহি সেই ভিডিঅ’ কৰা বুলি সন্দেহ কৰা হৈছে।ইফালে, আকাংক্ষাৰ মৃত্যুৰ পিছত তেওঁৰ মাতৃয়ে আৰক্ষীৰ ওচৰত অভিযোগ দাখিল কৰিছে।
খবৰ অনুসৰি ভোজপুৰী অভিনেতা সমৰ সিং আৰু তেওঁৰ ভাতৃ সঞ্জয়ৰ বিৰুদ্ধে গোচৰ ৰুজু কৰা হৈছে। সমৰ সিঙক সামাজিক মাধ্যমত আকাংক্ষাৰ মৃত্যুৰ বাবে দোষাৰোপ কৰা হৈছে। এইটো অভিযোগ কৰা হৈছে যে আকাংক্ষাই সমৰক ভাল পাইছিল আৰু তেওঁৰ সৈতে হোৱা মতভেদৰ বাবেই যুৱ অভিনেত্ৰীগৰাকীয়ে আত্মহত্যাৰ পথ বাছি লৈছে।
Continue Reading
