ডিজিটেল ডেস্ক: লোকসভাত গৃহীত হ’ল মহিলা সংৰক্ষণ বিধেয়ক৷ ‘নাৰী শক্তি বন্দন অধিনিয়ম' লোকসভাই সংখ্যাগৰিষ্ঠ ভোটৰ সৈতে গৃহীত কৰিছে। গৃহীতকৰণৰ বাবে হোৱা ভোটগ্ৰহণৰ পাছত বিধেয়কখনে সপক্ষে ৪৫৪টা আৰু বিপক্ষে ২টা ভোট লাভ কৰে৷ বিধেয়কখন লোকসভাত গৃহীত হ'বলৈ দুই তৃতীয়াংশ সদস্যৰ সমৰ্থনৰ প্ৰয়োজন আছিল।
লক্ষণীয়ভাৱে, সংসদৰ বিশেষ অধিৱেশনৰ তৃতীয় দিনটোত লোকসভাত মহিলা সংৰক্ষণ বিধেয়ক সন্দৰ্ভত এক বিতৰ্ক অনুষ্ঠিত হৈছিল৷ আনহাতে ৰাজ্যসভাত চন্দ্ৰযান-৩ৰ চন্দ্ৰত সফল অৱতৰণৰ ওপৰত গুৰুত্ব দি ভাৰতৰ মহাকাশ যাত্ৰা সন্দৰ্ভত আলোচনা কৰা হৈছিল।
লোকসভা আৰু ৰাজ্যিক বিধানসভাসমূহত মহিলাসকলৰ বাবে ৩৩ শতাংশ কোটা প্ৰদান কৰিব বিচৰা মহিলা সংৰক্ষণ বিধেয়কখন কালি লোকসভাত সংসদৰ চলিত বিশেষ অধিৱেশনত উত্থাপন কৰা হৈছিল আৰু আজি আলোচনাৰ বাবে উত্থাপন কৰা হৈছিল। কেন্দ্ৰীয় কেবিনেটে সোমবাৰে মহিলা সংৰক্ষণ বিধেয়কত অনুমোদন জনাইছে। কাইলৈ ৰাজ্যসভাত উত্থাপন হ’ব বিধেয়কখন৷
কংগ্ৰেছকে ধৰি বিৰোধী দলসমূহে বিধেয়কখন তাৎক্ষণিকভাৱে ৰূপায়ণৰ দাবী জনাইছিল। তেওঁলোকে বিধেয়কখনত অ’বিচি সংৰক্ষণৰ দাবী জনাইছিল। মঙলবাৰে কেন্দ্ৰীয় আইন মন্ত্ৰী অৰ্জুন ৰাম মেঘৱালে নতুন সংসদ ভৱনত লোকসভাৰ প্ৰথম বৈঠকতে বিধেয়কখন উত্থাপন কৰে। ২০০৮ চনত ড° মনমোহন সিং নেতৃত্বাধীন ইউপিএ চৰকাৰে বিধেয়কখন ৰাজ্যসভাত উত্থাপন কৰিছিল, আৰু ইয়াক ২০১০ চনত গৃহীত কৰা হৈছিল। অৱশ্যে, বিধেয়কখন কেতিয়াও লোকসভাত বিবেচনাৰ বাবে গ্ৰহণ কৰা হোৱা নাছিল।
Continue Reading
