জেএনইউৰ ছাত্ৰসমাজে দেশক দিলে নতুন বাৰ্তা; ছাত্ৰ একতা সভাৰ নিৰ্বাচনত বাঁওমৰ্চা সমৰ্থিত প্ৰাৰ্থীৰ জয়

ডিজিটেল ডেস্ক: প্ৰগতিশীল চিন্তাৰ কঠীয়াতলী জৱাহৰলাল নেহৰু বিশ্ববিদ্যালয়ৰ ছাত্ৰসমাজে দেশক দিছে নতুন বাৰ্তা৷ অখিল ভাৰতীয় বিদ্যাৰ্থী পৰিষদৰ আগ্ৰাসী ৰাজনীতি ওফৰাই জৱাহৰলাল নেহৰু বিশ্ববিদ্যালয় ছাত্ৰ একতা সভাৰ নিৰ্বাচনত জয়ী হ’ল কেউগৰাকী বাঁওমৰ্চা সমৰ্থিত প্ৰাৰ্থী৷ সভাপতি পদত ধনঞ্জয়ে ৩,১০০টা ভোট লাভ কৰাৰ বিপৰীতে এবিভিপিৰ উমেশ চন্দ্ৰ আজমীৰাই লাভ কৰে ২,১১৮টা ভোট৷ উপ-সভাপতি পদত এবিভিপিৰ দীপিকা শৰ্মাই ১,৮৪৮টা ভোট লাভ কৰাৰ বিপৰীতে বাঁওমৰ্চাৰ প্ৰাৰ্থী অভিজিৎ ঘোষে ২,৭৬২টা ভোট লাভ কৰি জয়লাভ কৰে৷ একেদৰে, সাধাৰণ সম্পাদক পদত এবিভিপিৰ অৰ্জুন আনন্দই লাভ কৰে ২,৪১২টা ভোট৷ তাৰ বিপৰীতে বাঁওমৰ্চা সমৰ্থিত প্ৰিয়াঞ্চি আৰ্যাই লাভ কৰে ৩,৪৪০টা ভোট৷ সহঃ সম্পাদকৰ পদত এবিভিপিৰ গোবিন্দ দাংগীয়ে ২,৫৯১টা ভোট লাভ কৰাৰ বিপৰীতে বাঁওমৰ্চা সমৰ্থিত মহম্মদ ছাজিদে ৩,০৩৫টা ভোট লাভ কৰি বিজয় সাব্যস্ত কৰে৷ জেএনইউ ছাত্ৰ একতা সভাৰ নিৰ্বাচনক কেন্দ্ৰ কৰি শিক্ষানুষ্ঠানখনৰ চৌহদত দেওবাৰে উত্তপ্ত পৰিস্থিতিৰ সৃষ্টি হয়৷ চাৰিবছৰ পাছত অনুষ্ঠিত নিৰ্বাচনৰ দেওবাৰে ভোটগণনা প্ৰক্ৰিয়া আৰম্ভ হৈছিল৷ সভাপতি, উপ-সভাপতি, সাধাৰণ সম্পাদক আৰু সহকাৰী সাধাৰণ সম্পাদক এই চাৰিটা প্ৰধান পদৰ বাবে আৰএছএছৰ সমৰ্থনপ্ৰাপ্ত এবিভিপি আৰু বাঁওপন্থী ছাত্ৰ শিবিৰৰ মাজত তুমুল প্ৰতিদ্বন্দ্বিতা হৈছিল৷ উল্লেখযোগ্য যে, জেএনইউত বিজয়ী হোৱা বাঁওমৰ্চাত থকা সংগঠনকেইটা হৈছে: অল ইণ্ডিয়া ষ্টুডেণ্ট এছোচিয়েশ্যন (আইচা), ডেম’ক্ৰেটিক ষ্টুডেণ্টছ ফেডাৰেশ্যন (ডিএছএফ), ষ্টুডেণ্টছ ফেডাৰেশ্যন অব্ ইণ্ডিয়া (এছএফআই) আৰু অল ইণ্ডিয়া ষ্টুডেণ্টছ ফেডাৰেশ্যন (এআইএছএফ)৷