ডিজিটেল ডেস্কঃ ঝাৰখণ্ডৰ মুখ্যমন্ত্ৰী পদৰ পৰা পদত্যাগ কৰিলে হেমন্ত ছোৰেণে। ইডিয়ে ভূমি কেলেংকাৰীকে ধৰি আন গোচৰত গ্ৰেপ্তাৰ সম্ভাৱনা প্ৰকট হোৱাৰ সময়তে হেমন্ত ছোৰেণে পদত্যাগ কৰে। কেতবোৰ সূত্ৰই প্ৰকাশ কৰা অনুসৰি হেমন্ত ছোৰেণক ইতিমধ্যে ইডিয়ে গ্ৰেপ্তাৰ কৰিছে। কিন্ত প্ৰাগ নিউজ ডিজিটেলে এতিয়াও ছোৰেণৰ গ্ৰেপ্তাৰৰ খবৰ নিশ্চিত কৰিব পৰা নাই।
যথাসময়ত পাঠকক এই বিষয়ে অৱগত কৰা হ’ব। ইপিনে ঝাৰখণ্ডত শাসকীয় মিত্ৰজোঁটে পৰিবহন মন্ত্ৰী চম্পাই ছোৰেণক জেএমএম বিধায়িনী দলৰ নেতা হিচাপে নিৰ্বাচিত কৰিছে বুলি কংগ্ৰেছ নেতা ৰাজেশ ঠাকুৰে প্ৰকাশ কৰিছে। ফলত চম্পাই ছোৰেণেই হ’ব ঝাৰখণ্ডৰ নতুন মুখ্যমন্ত্ৰী।
উল্লেখ্য ঝাৰখণ্ডৰ মুখ্যমন্ত্ৰী হেমন্তৰ ছোৰেণৰ ঘৰত উপস্থিত হ’ল ইডি।। কেৱল সেয়াই নহয় হেমন্তৰ ছোৰেণৰ বাসগৃহৰ চৌদিশৰ কিছু এলেকাত ১৪৪ ধাৰা জাৰি কৰা হৈছে। বুধবাৰে ইডিৰ জেৰা আৰম্ভ হোৱাৰ আগতে হেমন্ত ছোৰেণে তেওঁৰ পিতৃ শিবু সোৰেণৰ সৈতে কিছু সময় কথা পাতিছিল। দলৰ বিধায়কসকলেও তেওঁৰ বাসগৃহত উপস্থিত হয় । ইডিৰ অভিযানৰ বিুৰুদ্ধে জেএমএমৰ কৰ্মীসকলে প্ৰতিবাদ আৰম্ভ কৰিছে।
তেওঁলোকে ৰাজভৱনলৈ যাত্ৰা কৰাৰ সম্ভাৱনা আছে বুলি বিশেষ সূত্ৰই প্ৰকাশ কৰিছে। কঠোৰ নিৰাপত্তাৰ মাজত হেমন্ত ছোৰেণক প্ৰশ্ন কৰিবলৈ ইডিৰ দলটো তেওঁৰ বাসভৱনত উপস্থিত হয় । বুধবাৰে দুপৰীয়া প্ৰায় ১ বজাত ইডিৰ বিষয়াসকল ঝাৰখণ্ডৰ মুখ্যমন্ত্ৰীৰ বাসগৃহত উপস্থিত হয়। তেওঁলোকৰ লগত চিআৰপিএফৰ এটা ডাঙৰ দলো আছে। বিশেষ সূত্ৰই প্ৰকাশ কৰা মতে যদি হেমন্তক ইডিয়ে গ্ৰেপ্তাৰ কৰে তেন্তে ঝাৰখণ্ডত অশান্তিৰ জুই জ্বলি উঠিব পাৰে।
ৰাজ্যখনত আইন-শৃংখলা বজাই ৰখাৰ বাবে বিত্ত সচিবৰ নেতৃত্বত তিনিজনীয়া দল গঠন কৰা হৈছে।
২০ জানুৱাৰীত ইডিয়ে বাসভৱনতে হেমন্ত ছোৰেণক সোধা-পোছা কৰিছিল। ভূমি কেলেংকাৰিৰ লগতে ধনৰ অবাধ সৰবৰাহৰ গোচৰত ইডিয়ে ছোৰেণক জেৰা চলাই আছে। সোধা-পোছাৰ সময়ত ইডিৰ বিষয়াসকল সন্তুষ্ট হোৱা নাই । সেইবাবেই ইডিয়ে তেওঁক অধিক প্ৰশ্ন কৰাৰ বাবে পুনৰ জেৰা চলাইছে। ইপিনে মুখ্যমন্ত্ৰী হেমন্ত ছোৰেণে ইডিৰ বিৰুদ্ধে এজাহাৰ দাখিল কৰিছে। দিল্লীৰ এছটি-এছচি আৰক্ষী থানাত ছোৰেণে ইডিৰ বিৰুদ্ধে এজাহাৰ দাখিল কৰিছে।
Continue Reading
