ডিজিটেল ডেস্কঃ জিপিএছ চাই গাড়ী চলোৱাটো কিমান ভয়ংকৰ সেই কথা শেহতীয়াকৈ সংঘটিত হোৱা এক ঘটনাই প্ৰমাণ কৰি গ'ল। জিপিএছ অনুসৰণ কৰি গাড়ী চলাই যাওতে নিৰ্মীয়মান দলঙৰ পৰা নদীত পৰিল এখন গাড়ী; এই ঘটনাত তিনিজনৰ কৰুণ মৃত্যু ঘটিছে।উত্তৰ প্ৰদেশৰ বৰেলীত সংঘটিত হৈছে এই ঘটনা। এই দুৰ্ঘটনাত চালকসহ তিনিজন লোকে প্ৰাণ হেৰুৱাইছে।
জিপিএছ চাই চাই নির্মীয়মান দলঙৰ ওপৰেৰে তীব্ৰ বেগেৰে গাড়ীখন চলাইছিল চালকে৷ গাড়ীখন পোনে পোনে গৈ নদীত পৰিল। বৰেলীৰ পৰা ডাটাগঞ্জলৈ গাড়ীখনত গৈ আছিল তিনিজন যাত্ৰী। গাড়ীখন খালপুৰ-ডাটাগঞ্জ পথটোৰে আগবাঢ়িছিল। এই পথতে আছে নিৰ্মীয়মান দলংখন। গাড়ীৰ চালকজনে মোবাইলত জিপিএছৰ নিৰ্দেশনা অনুসৰণ কৰি আছিল। দলঙত উঠি দ্ৰুতগতিত গাড়ী চলায় চালকে কিন্তু গাড়ীখন পোনে পোনে গৈ ৰামগংগা নদীত পৰে।
জানিব পৰা মতে চলিত বৰ্ষৰ বানপানীৰ সময়ত দলংখনৰ সন্মুখৰ অংশ ভাঙি গৈছে। ইয়াৰ পাছতে দলংখনৰ নির্মাণৰ কামো আৰম্ভ হয়৷ কিন্তু জিপিএছ আপডেট কৰা হোৱা নাছিল। সেইবাবেই চাগে চালকজনে গম পোৱা নাছিল যে দলংখন নিৰাপদ নহয়। আনকি, দলংখনত কোনো সতৰ্কবাণী ফলকো নাছিল।
গাড়ীখন দলঙৰ পৰা প্ৰায় ৫০ ফুট তলত নদীত বাগৰি পৰে। স্থানীয় বাসিন্দাসকলে এই কথা লক্ষ্য কৰি লগেলগে আৰক্ষীক খবৰ দিয়ে। আৰক্ষীয়ে তিনিওৰে মৃতদেহ উদ্ধাৰ কৰি মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰে আৰু নদীৰ পৰা উদ্ধাৰ কৰে গাড়ীখন।
এই ঘটনাৰ বাবে সকলোৱে প্ৰশাসনৰ গাফিলতিকে জগৰীয়া কৰিছে।
Continue Reading
