নতুন দিল্লীত 'লাচিত দিৱস' উদযাপন; কেন্দ্রীয় মন্ত্রী সর্বানন্দ সোণোৱালৰ

অনুষ্ঠানৰ আৰম্ভণিতে মহান আহোম সেনাপতি লাচিত বৰফুকনৰ প্ৰতিচ্ছবিত পুষ্পাঞ্জলি অর্পণেৰে শ্ৰদ্ধার্ঘ অর্পণ কৰে। কেন্দ্রীয় মন্ত্রী সর্বানন্দ সোণোৱালে ভাষণ প্রসংগত কয় যে, ভাৰতৰ ইতিহাসৰ এগৰাকী প্রবাদপ্রতিম মহাবীৰ লাচিত বৰফুকনৰ শৌৰ্য-বীর্ষ, অদম্য শক্তি, সাহস আৰু বীৰত্বৰ কাহিনীয়ে দেশবাসীক অনুপ্ৰেৰণা যোগাই আহিছে। লগতে এখন শক্তিশালী, সমৃদ্ধিশালী, আত্মনিৰ্ভৰ আৰু বিকশিত ভাৰত গঢ়াৰ দিশত লাচিত বৰফুকনৰ স্বদেশ-স্বজাতিৰ প্ৰতি থকা অতুলনীয় দায়বদ্ধতা, কর্মচেতনা, আত্মনিৰ্ভৰ ৰণকৌশল আৰু সাহসৰ দৃষ্টান্ত আমাৰ বাবে পাথেয় হৈ থাকিব। কেন্দ্রীয় মন্ত্রী সর্বানন্দ সোণোৱালে লগতে কয়, ঐতিহাসিক শৰাইঘাটৰ ৰণ মহাবাহু ব্ৰহ্মপুত্ৰৰ জলপথত খুঁজা সর্ববৃহৎ যুদ্ধ। লাচিতে তাহানিতে যুদ্ধক্ষেত্ৰৰ জৰিয়তে আভ্যন্তৰীণ জলপথৰ শক্তি-সম্ভাৱনাক উপলব্ধি কৰিছিল। লাচিতৰ দূৰদৰ্শিতাক উপলব্ধি কৰি আমিও ব্ৰহ্মপুত্ৰকে ধৰি দেশৰ জলপথৰ অপৰিসীম সুযোগ-সম্ভাৱনা, শক্তিক ৰাষ্ট্ৰ হিতৰ বাবে ব্যৱহাৰ কৰি ন ন পদক্ষেপ গ্ৰহণ কৰি আছোঁ। মোগল সাম্রাজ্যৰ দুৰ্বলতা প্ৰকাশ কৰি লাচিত বৰফুকনে বীৰদর্পে দেখুৱাই দিছিল দেশমাতৃৰ প্ৰতি থকা তেওঁৰ অপৰিসীম শ্রদ্ধা আৰু ভক্তিৰ গাথা।

বিশিষ্ট ইতিহাসবিদ তথা অর্থনীতিবিদ সঞ্জীৱ সান্যালে ভাষণ প্রসংগত কয়, লাচিত বৰফুকন ভাৰতৰ সর্বশ্রেষ্ঠ এডমিৰেল। শৰাইঘাটৰ ৰণ বিশ্বৰ অন্যতম বৃহৎ নৌ যুদ্ধৰ এক নিদর্শন। ঐতিহাসিক শৰাইঘাটৰ যুদ্ধত লাচিত বৰফুকনৰ নেতৃত্বাধীন অসমীয়া সৈন্যবাহিনীয়ে মোগলক পৰাস্ত কৰাৰ পাছত মোগলৰ আধিপত্যৰ পতনৰ আৰম্ভণি ঘটিছিল। যিদৰে মাৰাঠা নৌ শক্তি অবিহনে আমি মাৰাঠা ইতিহাস বুজিব নোৱাৰোঁ, একেদৰেই লাচিত বৰফুকনৰ নেতৃত্বত থকা অসমীয়া সৈন্যই নৌ-যুদ্ধত দেখুওৱা অসীম বীৰত্ব আৰু পাৰদৰ্শিতাৰ ইতিহাস অবিহনে অসমৰ ইতিহাস আধৰুৱা। এতিয়া গুপ্ত যুগৰ জাহাজৰ পুনৰ নিৰ্মাণ কৰা হৈ আছে। একেদৰেই তাহানিৰ দুই মহা নৌশক্তি মাৰাঠা সাম্ৰাজ্যৰ যুগৰ আৰু লাচিত যুগৰ নৌকা পুনৰ নিৰ্মাণ কৰি আমি ইতিহাসক পুনৰুজ্জীৱিত কৰি তুলিব পাৰোঁ বুলি মন্তব্য কৰে৷