ডিজিটেল ডেস্কঃ কোৰিয়াৰ জনপ্ৰিয় অভিনেতা পাৰ্ক মিন জেৰ ৩২ বছৰ বয়সত মৃত্যু। হাৰ্ট এটেক হোৱাৰ বাবে তেওঁ মৃত্যুক সাবটি লয়। তেওঁৰ পৰিয়াল আৰু এজেন্সীয়ে ছ’চিয়েল মিডিয়াত এটা পোষ্টৰ জৰিয়তে তেওঁৰ মৃত্যুৰ খবৰ তেওঁৰ অনুৰাগীক দিয়ে। এই খবৰ পোৱাৰ পাছতেই পাৰ্ক মিন জেৰ অনুৰাগীসকল দুখত ভাগি পৰিছে।
৪ ডিচেম্বৰত পাৰ্ক মিন জেৰ শেষকৃত্য সম্পন্ন হয়। পাৰ্কৰ পৰিয়াল আৰু এজেন্সীয়ে ছ’চিয়েল মিডিয়া পোষ্টৰ জৰিয়তে তেওঁৰ অনুৰাগীসকলক এই বিষয়ে অৱগত কৰে। পাৰ্কৰ কনিষ্ঠ ভাতৃয়ে ইনষ্টাগ্ৰাম পোষ্টত লিখিছে, ‘‘আমাৰ প্ৰিয় ভাতৃ এতিয়া শান্তিৰে শুইছে। আমি আশা কৰিছো যে শেষবাৰৰ বাবে তেওঁক বিদায় জনাবলৈ আপোনালোক আহিব।’’
পাৰ্কৰ এজেন্সী ‘বিগ টাইটেল’ইও তেওঁৰ বাবে লিখিছে, ‘‘সদায় নিজৰ শ্ৰেষ্ঠতা উজাৰি দিয়া পাৰ্ক মিন জে আৰু আমাৰ মাজত নাই। তেওঁ এজন অতি প্ৰতিভাৱান অভিনেতা আছিল। যদিও আমি তেওঁৰ কাম আৰু চাব নোৱাৰিম, কিন্তু আমি তেওঁক বিগ টাইটেলৰ আটাইতকৈ বিশেষ অভিনেতা হিচাপে স্মৰণ কৰিম। আশাকৰোঁ তেওঁৰ আত্মাই শান্তি লাভ কৰিব।’’
উল্লেখ্য যে পাৰ্ক মিন জেই বহু কোৰিয়ান নাট্য ছবি আৰু ধাৰাবাহিকত কাম কৰিছে। কোৰিয়াৰ নাট্য ধাৰাবাহিক ‘আইডল: দ্য ক’প’ত কাম কৰাৰ বাবে তেওঁ বেছিকৈ পৰিচিত। ইয়াৰ উপৰিও কোৰিয়ান নাটক ‘লিটিল উইমেন’, ‘নাম্বাৰ্ছ’, ‘কোৰিয়া-খিটান ৱাৰ’, ‘কল ইট লাভ’ আদি নাটকতো কাম কৰিছে। শেহতীয়াকৈ তেওঁ কোৰিয়াৰ ৱেব ছিৰিজ ‘স্নেপ এণ্ড স্পাৰ্ক’ত কাম কৰি আছিল।
Continue Reading
