ডিজিটেল ডেস্ক: অসমৰ চলচ্চিত্ৰ, সংগীত, নাটক আৰু সাহিত্যৰ এক গৌৰৱোজ্জ্বল ইতিহাস বুকুত সাবটি আজিও সগৌৰৱে আছে এখন ঐতিহাসিক চকী। গহপুৰৰ গমিৰিৰ বেবেজীয়া গাঁৱৰ উদয় চন্থলীয়াৰ ঘৰত অতি সযতনে সংৰক্ষণ কৰি ৰখা হৈছে অসমীয়া সংস্কৃতিৰ এই আপুৰুগীয়া সম্পদ। এইখন কোনো সাধাৰণ চকী নহয়, ই হৈছে অসমীয়া কলা-সংস্কৃতিৰ কাণ্ডাৰী, ৰূপকোঁৱৰ জ্যোতিপ্ৰসাদ আগৰৱালাই ব্যৱহাৰ কৰা ঐতিহাসিক আসন।
সময়ৰ বুকুত বহু দশক পাৰ হৈ গ’ল, কিন্তু এই চকীখনে আজিও কঢ়িয়াই ফুৰিছে ৰূপকোঁৱৰৰ অমিয়া সৃষ্টিৰ সুবাস। এই চকীখনত বহিয়েই জ্যোতিপ্ৰসাদে ৰচনা কৰিছিল ইখনৰ পিছত সিখন কালজয়ী নাটক, সৃষ্টি কৰিছিল যুগজয়ী গীতৰ। ইয়াতেই বহি তেওঁ অসমীয়া সমাজখনক প্ৰগতিৰ পথেৰে আগুৱাই নিয়াৰ বাবে গভীৰ চিন্তা-চৰ্চা কৰিছিল।
এই চকীখন কেৱল কাঠেৰে নিৰ্মিত এখন আসন নহয়; ই হৈছে অসমৰ শিল্প-চেতনা আৰু ঐতিহ্যৰ এক জীৱন্ত দলিল। ৰূপকোঁৱৰৰ সৃষ্টিশীলতাৰ বাস্তৱ সাক্ষী হৈ ৰোৱা এই ঐতিহাসিক চকীখন অসমীয়া জাতিৰ বাবে এক সম্পদ। ই নতুন প্ৰজন্মক জ্যোতিপ্ৰসাদ আগৰৱালাৰ অতুলনীয় অৱদান, ত্যাগ আৰু মহান ব্যক্তিত্বৰ কথা সোঁৱৰাই দিয়ে। গমিৰিৰ এই পৰিয়ালটোৱে চকীখনক যিদৰে আজিও সুন্দৰকৈ ৰাখিছে, সেয়া সঁচাকৈয়ে প্ৰশংসনীয়।
Continue Reading
