ডিজিটেল ডেস্ক: দেশৰ সাধাৰণ নিৰ্বাচনৰ সময়তে সুৰা কেলেংকাৰীৰ সৈতে জড়িত থকাৰ অপৰাধত দিল্লীৰ মুখ্যমন্ত্ৰী অৰবিন্দ কেজৰিৱালক গ্ৰেপ্তাৰ কৰা হৈছ্ল। ভাৰতীয় ইতিহাসত কাৰ্যকাল চলি থকা অৱস্থাতে কোনো মুখ্যমন্ত্ৰীৰ গ্ৰেপ্তাৰৰ ঘটনা সম্ভৱত এয়ে প্ৰথম।
নিৰ্বাচন চলি থকা অৱস্থাতে এগৰাকী শক্তিশালী বিৰোধী নেতাৰ গ্ৰেপ্তাৰৰ আঁৰত শাসক দলৰ কোনো ষড়যন্ত্ৰ থকা বুলি আপৰ নেতৃবৰ্গই অভিযোগ উত্থাপন কৰিছিল। এই সন্দৰ্ভত উচ্চতম ন্যায়ালয়ত বিচাৰ চলি আছে যদিও এই পৰ্যন্ত দোষী সাব্যস্ত কৰিব পৰা নাই গোচৰীয় পক্ষই। আবকাৰী নীতি প্ৰণয়ন আৰু কাৰ্যকৰীকৰণত অনিয়মৰ গোচৰতে ২৬ ফেব্ৰুৱাৰীত দিল্লীৰ উপ মুখ্যমন্ত্ৰী মনীষ চিছ’দিয়াকো ন্যায়িক জিম্মালৈ প্ৰেৰণ কৰা হৈছিল।
শেহতীয়া তথ্য অনুসৰি বুধবাৰে দিল্লীৰ মুখ্যমন্ত্ৰী তথা আম আদমী পাৰ্টিৰ মুৰব্বী অৰবিন্দ কেজৰিৱালৰ অন্তৱৰ্তীকালীন জামিন আবেদনৰ শুনানি গ্ৰহণ নকৰিলে উচ্চতম ন্যায়ালয়ে। উচ্চতম ন্যায়ালয়ে এই সন্দৰ্ভত কেন্দ্ৰীয় তদন্তকাৰী সংস্থা চিবিআইৰ বক্তব্য বিচাৰিছে। এই গোচৰৰ পৰৱৰ্তী শুনানি ২৩ আগষ্টত হ’ব বুলি সদৰী কৰিছে আদালতে।
কেজৰিৱালৰ অধিবক্তাই আদালতত জনোৱা মতে, আবকাৰী গোচৰ ৰুজু হোৱাৰ এবছৰ দহ মাহৰ পাছত চিবিআইয়ে তেওঁক গ্ৰেপ্তাৰ কৰে। ইয়াৰ পিছতে কেজৰিৱালৰ অন্তৱৰ্তীকালীন জামিনৰ বাবে আবেদন জনোৱা হৈছিল। ন্যায়াধীশ সূৰ্য কেণ্টাৰৰ এখন বিচাৰপীঠে নাকচ কৰিছে অন্তৱৰ্তীকালীন জামিনৰ আবেদন।
উল্লেখযোগ্য যে দিল্লীৰ মুখ্যমন্ত্ৰীগৰাকীক ২১ মাৰ্চত আবকাৰী গোচৰত ইডিয়ে গ্ৰেপ্তাৰ কৰিছিল। তেতিয়াৰ পৰাই কাৰাগাৰত আছে মুখ্যমন্ত্ৰীগৰাকী। লোকসভা নিৰ্বাচনৰ সময়ত উচ্চতম ন্যায়ালয়ৰ নিৰ্দেশত অন্তৱৰ্তীকালীন জামিন লাভ কৰি কিছুদিন মুকলি আকাশৰ তলত আছিল। জামিন সমাপ্ত হোৱাৰ বাবে ২ জুনত পুনৰ আত্মসমৰ্পণ কৰে কেজৰীৱালে।
আনহাতে, নিম্ন আদালতৰ পৰাও কেইবাবাৰো জামিন বিচাৰি উচ্চতম ন্যায়ালয়লৈ আবেদন জনাইছিল দিল্লীৰ মুখ্যমন্ত্ৰীগৰাকীয়ে। কিছুদিন পূৰ্বে উচ্চতম ন্যায়ালয়ে ইডি গোচৰত জামিন মঞ্জুৰ কৰিছিল যদিও কাৰাগাৰত থকাৰ সময়তে এই গোচৰত চিবিআইয়ে গ্ৰেপ্তাৰ কৰে মুখ্যমন্ত্ৰী গৰাকীক।
২৩ আগষ্টৰ শুনানিৰ পিছতহে পোহৰলৈ আহিব দিল্লীৰ মুখ্যমন্ত্ৰী অৰবিন্দ কেজৰিৱাল মুকলি আকাশৰ তললৈ আহিব নে নাহে? নে কাৰাগাৰতে আবদ্ধ হৈ থাকিব লাগিব মুখ্যমন্ত্ৰীগৰাকী?
