আটছা'ৰ অনুষ্ঠানত শিক্ষা বিভাগক তুলা-ধুনা সাংসদ কামাখ্যা তাছাৰ

ডিজিটেল ডেস্ক : অসমৰ শিক্ষা বিভাগত কোনো 'পলিচি'য়েই নাই। ৰাজ্যৰ প্ৰাথমিক বিদ্যালয়সমূহৰ অৱস্থা অত্যন্ত বেয়া। এই অৱস্থাই যদি অব্যাহত থাকে তেনেহ'লে ৰাজ্যৰ শিক্ষাৰ ভৱিষ্যৎ অন্ধকাৰ।

শনিবাৰে গুৱাহাটীৰ মাছখোৱাৰ আই টি এ চেণ্টাৰত অসম চাহ জনজাতি ছাত্ৰ সন্থাৰ উদ্যোগত আয়োজিত চাহ শ্রমিকৰ কৃতী ছাত্ৰ-ছাত্ৰীসকলৰ বিশেষ অভিনন্দন অনুষ্ঠানত উপস্থিত থাকি এই বিস্ফোৰণ ঘটাইছে বিজেপিৰ সাংসদ কামাখ্যা তাহাই।

তাছাই এইবুলিও কয় যে ৰাজ্যৰ শিক্ষাৰ 'পলিচি'ৰ ওপৰত কৰিবলগীয়া বহু কাম আছে। ৰাজ্যৰ শিক্ষা বিভাগৰ ব্যৰ্থতাৰ বিৰুদ্ধে অনুষ্ঠানত ক্ষোভ প্রকাশৰ ইমানতে অন্ত পৰা নাছিল। আটছাৰ সভাপতি ধীৰাজ গোৱালাই শিক্ষা মন্ত্ৰী ৰণোজ পেণ্ডৰ সন্মুখতে কয়- শিক্ষা বিভাগে ৰাজ্যৰ চাহ বাগিচাসমূহত স্থাপন কৰা ১১৬খন মডেল হাইস্কুলৰ অধিকাংশৰে ২০২৫ বৰ্ষত মেট্ৰিকৰ উত্তীৰ্ণৰ হাৰ শূন্য। গোৱালাই লগতে এইবুলিও কয় যে অধিকাংশ মডেল হাইস্কুলতে স্থায়ী প্রধান শিক্ষক নাই, বিষয় শিক্ষক নাই আৰু চতুৰ্থ বৰ্গৰ কৰ্মচাৰীসকলে বিগত ৩ বছৰ ধৰি দৰমহা পোৱা নাই। উল্লেখযোগ্য যে শনিবাৰৰ এই অনুষ্ঠানত চাহ জনগোষ্ঠীৰ ৬০ শতাংশ আৰু তাতকৈ বেছি নম্বৰ লাভকৰি উচ্চ আৰু উচ্চতৰ মাধ্যমিক পৰীক্ষাত উত্তীৰ্ণ হোৱা তিনি হাজাৰৰো অধিক ছাত্র-ছাত্রীক বিশেষভাবে সম্বর্ধনা জনোৱা হয়।

এই অনুষ্ঠানত বিশিষ্ট অতিথি ৰূপে উপস্থিত থাকি শিক্ষা মন্ত্রী ডাঃ ৰণোজ পেগুৱে কামাখ্যা তাছা আৰু ধীৰাজ গোৱালাৰ অভিযোগ সম্পর্কত একো নকৈ মাত্র কয় যে চাহ বাগিচা অঞ্চলত অধিক মডেল হাইস্কুল শিক্ষা বিভাগে স্থাপন কৰিব। তেওঁ কয় যে প্ৰধানমন্ত্ৰীৰ চাহ শ্রমিক প্ৰোচাহন যোজনাৰ অধীনত বাগিচা অঞ্চলৰ প্ৰাথমিক বিদ্যালয়সমূহৰ আন্তঃগাঁথনি উন্নত কৰা হ'ব আৰু বিদ্যালয়সমূহৰ সুকীয়া শ্ৰেণীকোঠা নিৰ্মাণ কৰা হ'ব। অনুষ্ঠানত শ্রম মন্ত্ৰী ৰূপেশ গোৱালা, জ্যেষ্ঠ কংগ্ৰেছ নেতা পৱন সিং ঘাটোৱাৰ, জ্যেষ্ঠ সাংবাদিক ৰাজদ্বীপ বাইলুং আৰু বিদ্যালয় শিক্ষা পৰিষদৰ অধ্যক্ষ ৰমেশ চান্দ জৈন উপস্থিত থাকে। এই অনুষ্ঠানতে আটছাই প্রকাশ কৰা কেৰিয়াৰ গাইডেন্স পুথি 'জ্ঞানমার্গ' উন্মোচন কৰা হয়।

উৎসঃ দৈনিক জনমভূমি