কেন্দ্ৰীয় চৰকাৰৰ নতুন নীতি: অৰুণাচল, মিজোৰামকো কৰি পেলালে ক’লীয়া পানী

ডিজিটেল ডেস্ক: কেন্দ্ৰীয় লোকসেৱা আয়োগৰ জম্মু আৰু কাশ্মীৰ কেডাৰক যোৱা বছৰৰ জানুৱাৰীত ‘এজিএমইউটি’ কেডাৰৰ সৈতে একত্ৰিত কৰা হৈছিল, যাৰ ফলস্বৰূপে পূৰ্বৰ ৰাজ্যখনক ২০১৯ চনৰ ৫ আগষ্টত দুটা কেন্দ্ৰীয় শাসিত অঞ্চল জম্মু আৰু কাশ্মীৰ, লাডাখত বিভক্ত কৰা হৈছিল৷ প্ৰশাসনীয় সেৱা আগবঢ়োৱা ‘এজিএমইউটি’ কেডাৰ আৰু জম্মু-কাশ্মীৰ আৰু লাডাখ কেডাৰক এতিয়াৰ পৰা লোকসেৱাৰ ‘কঠিন ক্ষেত্ৰ’ হিচাপে গণ্য কৰা হ'ব। এক চৰকাৰী তথ্য অনুসৰি, এই সন্দৰ্ভত কেন্দ্ৰীয় চৰকাৰে সিদ্ধান্ত গ্ৰহণ কৰিছে আৰু তাৰ বাবে অৰুণাচল প্ৰদেশ, গোৱা, মিজোৰামৰ আইপিএছ বিষয়াসকলক কেন্দ্ৰীয় শাসিত অঞ্চল (এজিএমইউটি) কেডাৰ-২০১৬ৰ অধীনত স্থানান্তৰ আৰু নিযুক্তিৰ নিৰ্দেশনা সংশোধন কৰা হৈছে। গৃহ মন্ত্ৰণালয়ে সদৰি কৰা তথ্য অনুসৰি, ‘জে এণ্ড কেডাৰক এজিএমইউটি কেডাৰত একত্ৰিত কৰাৰ ফলস্বৰূপে, বিষয়টো পৰীক্ষা কৰা হৈছে আৰু সক্ষম কৰ্তৃপক্ষৰ অনুমোদনৰ সৈতে, সিদ্ধান্ত লোৱা হৈছে যে জম্মু-কাশ্মীৰৰ কেন্দ্ৰীয় শাসিত অঞ্চল আৰু লাডাখকেন্দ্ৰীয় শাসিত অঞ্চলক যুটীয়া এজিএমইউটি কেডাৰত শ্ৰেণী বি (কঠিন এলেকা) হিচাপে শ্ৰেণীবদ্ধ কৰা হ’ব পাৰে।’ সেই অনুসৰি, যুটীয়া এজিএমইউটি কেডাৰ -২০১৬ৰ আই.এ.এছ., আই.পি.এছ. বিষয়াসকলক স্থানান্তৰ, নিযুক্তিৰ নিৰ্দেশনা আংশিকভাৱে সংশোধন কৰা হৈছে আৰু এ.জি.এম.ইউ.টি. কেডাৰৰ খণ্ডবোৰক দুটা শ্ৰেণীত শ্ৰেণীবদ্ধ কৰা হৈছে৷ সেয়া হৈছে- নিয়মীয়া আৰু কঠিন ক্ষেত্ৰ। দিল্লী, চণ্ডিগড়, গোৱা, পুডুচেৰী, দাদৰ নগৰ হাভেলি আৰু দমন আৰু দিউত হোৱা নিযুক্তিক ‘নিয়মীয়া এলেকা’ বা শ্ৰেণী এ হিচাপে গণ্য কৰা হ'ব, আনহাতে অৰুণাচল প্ৰদেশ, মিজোৰাম, আন্দামান আৰু নিকোবৰ দ্বীপপুঞ্জ লাক্ষাদ্বীপ, জম্মু আৰু কাশ্মীৰ আৰু লাডাখত পোষ্টিংক ‘কঠিন অঞ্চল’ বা শ্ৰেণী বি হিচাপে গণ্য কৰা হ'ব।