ডিজিটেল ডেস্কঃ কেন্দ্ৰীয় পথ পৰিবহণ আৰু ঘাইপথ মন্ত্ৰী নীতিন গাডকাৰীয়ে মৃত্যুৰ ভাবুকি লাভ কৰে। অচিনাক্ত ব্যক্তিয়ে গাডকাৰীৰ নাগপুৰৰ কাৰ্যালয়লৈ কেইবাবাৰো ফোন কৰি হত্যাৰ ভাবুকি দিয়ে। নাগপুৰ আৰক্ষীৰ সূত্ৰই প্ৰকাশ কৰা মতে পুৱাৰে পৰা কমেও দুবাৰ কেন্দ্ৰীয় মন্ত্ৰীগৰাকীৰ নাগপুৰ কাৰ্যালয়লৈ ভাবুকিপূৰ্ণ ফোন কল কেইটা আহে। প্ৰথম কলটো পুৱা ১১.৩০ বজাত আহিছিল।
কেন্দ্ৰীয় মন্ত্ৰীজনক হত্যা আৰু বোমা বিস্ফোৰণ কৰি তেওঁৰ কাৰ্যালয় উৰুৱাই দিয়াৰ ভাবুকি দিয়া হৈছিল। দহ মিনিট পিছত, অচিনাক্ত দুৰ্বৃত্তই পুনৰ মন্ত্ৰীজনক হত্যা আৰু কাৰ্যালয় উৰুৱাই দিয়াৰ ভাবুকি দিয়ে।
ভাবুকিপূৰ্ণ কল পোৱাৰ পিছতে নীতিন গাডকাৰীৰ কাৰ্যালয়ৰ কৰ্মচাৰীসকল আতংকিত হৈ পৰিছে। তেওঁলোকে লগে লগে আৰক্ষীক খবৰ দিয়ে। আৰক্ষী ঘটনাস্থলীত উপস্থিত হৈ তদন্ত আৰম্ভ কৰিছে। নাগপুৰৰ ডিচিপি ৰাহুল মদনে কয় যে গোটেই ঘটনাটো সন্দৰ্ভত তদন্ত চলি আছে। মন্ত্ৰীজনৰ কাৰ্যালয়ৰ নিৰাপত্তা বৃদ্ধি কৰা হৈছে। একে সময়তে তেওঁৰ সকলো কাৰ্যসূচীত অতিৰিক্ত সুৰক্ষা ব্যৱস্থা কৰা হৈছে।
Continue Reading
