ডিজিটেল ডেস্ক: ভাৰতৰ মহাকাশ গৱেষণাৰ অন্যতম যুগনায়ক ৰাকেশ শৰ্মা৷ দীৰ্ঘদিন জনচক্ষুৰ আঁৰত থাকিয়েই নিৰলে জীৱন যাপন কৰি আহিছে ৰাকেশ শৰ্মাই৷ মহাকাশত ভৰি দিয়া প্ৰথমগৰাকী ভাৰতীয় মহাকাশচাৰী ৰাকেশ শৰ্মা৷
ভাৰতৰ চন্দ্ৰযান-৩ সাফল্যৰ সময়তো চৰ্চালৈ আহিছিল ৰাকেশ শৰ্মা৷ যিসময়ত দেশবাসীয়ে চন্দ্ৰযান-৩ সাফল্য উদযাপন কৰিছিলে সেই সময়ত সংবাদ মাধ্যমৰ পৰা বহুযোজন আঁতৰত আছিল ভাৰতৰ এইগৰাকী সুযোগ্য সন্তান৷
অৱশেষত দীৰ্ঘবিৰতিৰ পাছত দেখিবলৈ পোৱা গ’ল ৰাকেশ শৰ্মাক৷ আমেৰিকাৰ মহাকাশ গৱেষণা সংস্থা নাছাৰ অধ্যক্ষ বিল নেলচনে অলপতে সাক্ষাৎ কৰিলে ৰাকেশ শৰ্মাক৷ সম্প্ৰতি এসপ্তাহৰ ভাৰত ভ্ৰমণত নাছাৰ অধ্যক্ষ বিল নেলচন৷ মঙলবাৰে ছ’চিয়েল মিডিয়াযোগে পুৰণি বন্ধু ৰাকেশ শৰ্মাক সাক্ষাৎ কৰাৰ কথা প্ৰকাশ কৰিলে নেলচনে৷
লগতে প্ৰকাশ কৰিলে ৰাকেশ শৰ্মাৰে থকা তেওঁৰ দীৰ্ঘদিনীয়া বন্ধুত্বৰ কথা৷ উল্লেখ্য যে, ১৯৮৪ চনত মহাকাশত ভৰি দিছিল ৰাকেশ শৰ্মাই৷ মহাকাশত ৭ দিন ২১ ঘণ্টা ৪০ মিনিট কটাইছিল ভাৰতৰ মহাকাশচাৰীগৰাকীয়ে৷ ইয়াৰ লগে লগে ভাৰতীয় মহাকাশ অভিযানৰ ইতিহাসত স্বৰ্ণিল আখৰেৰে লিপিবদ্ধ হৈছিল ৰাকেশ শর্মাৰ নাম৷
সেইগৰাকী ৰাকেশ শৰ্মাই দীৰ্ঘদিন ধৰি আঁতৰি আছে লাইমলাইটৰ পৰা৷ তামিলনাডুৰ এখন ভিতৰুৱা ঠাইত নীৰৱে জীৱন অতিবাহিত কৰি আহিছে ৰাকেশ শৰ্মাই৷ ভাৰত-পাকিস্তানৰ যুদ্ধতো এগৰাকী যুঁজাৰু পাইলট হিচাপে দেশলৈ সেৱা আগবঢ়োৱা ৰাকেশ শৰ্মাই বাচি লৈছিল এটা শান্তিপূৰ্ণ জীৱন৷ বহুক্ষেত্ৰত চৰকাৰৰো অৱহেলাৰ পাত্ৰ হ’বলগীয়া হৈছিল দেশৰ প্ৰথমগৰাকী মহাকাশচাৰী ৰাকেশ শৰ্মা৷ চৰকাৰ তথা দেশৰ একাংশই পাহৰিলেও ৰাকেশ শৰ্মাক পাহৰা নাই নাছাৰ দৰে মহাকাশ গৱেষণা সংস্থাই৷
Continue Reading
