ডিজিটেল ডেস্কঃ ভাৰতত অনুষ্ঠিত হ’বলগীয়া এদিনীয়া বিশ্বকাপৰ বাবে ১৫ জনীয়া দল ঘোষণা কৰিছে অষ্ট্ৰেলিয়াই। যোৱা মাহত পেট কামিন্সে ১৮ জনীয়া প্ৰাৰম্ভিক দল ঘোষণা কৰিছিল। তাৰ পৰা তিনিজন লোকক বাদ দিয়া হৈছে। এই ১৫ গৰাকী খেলুৱৈয়ে বিশ্বকাপৰ পূৰ্বে এদিনীয়া শৃংখলা খেলিবলৈও ভাৰতলৈ আহিব।
অল ৰাউণ্ডাৰ এৰন হাৰ্ডি, পেচাৰ নাথান এলিছ আৰু স্পিনাৰ তনবীৰ চাঙক বাদ দিয়া হৈছে। বিশ্বকাপত অভিজ্ঞতাক অধিক গুৰুত্ব দিছে নিৰ্বাচকসকলে। মাৰ্নাছ লাবুচেনেও দলত সুযোগ নাপালে। ৰেডবল ক্ৰিকেটৰ নিৰ্ভৰযোগ্য বেটছমেনক অষ্ট্ৰেলিয়াই বগা বল ক্ৰিকেটত অন্তৰ্ভুক্ত কৰা নাই।
বিশ্বকাপত অষ্ট্ৰেলিয়াক নেতৃত্ব দিব কামিন্সে। বলিং বিভাগত তেওঁৰ সৈতে আছে মিচেল ষ্টাৰক আৰু জোছ হেজলউড। চতুৰ্থ পেচাৰ হিচাপে লোৱা হৈছে শ্বেন এবটক। এষ্টন আগৰ আৰু এডাম জাম্পা হৈছে স্পিনাৰ।
দলটোৰ বেটিং বিভাগত আছে ডেভিদ ৱাৰ্নাৰ, ষ্টিভ স্মিথ, ট্ৰেভিছ হেড। অষ্ট্ৰেলিয়া দলত অধিক অল-ৰাউণ্ডাৰ আছে। মিচেল মাৰ্ছ, গ্লেন মেক্সৱেল, মাৰ্কাছ ষ্ট’ইনিছ আৰু কেমেৰন গ্ৰীণক দলত স্থান দিছে। দলত লোৱা হৈছে দুই উইকেটকীপাৰ। তেওঁলোক হ’ল এলেক্স কেৰী আৰু জোছ ইংলিছ।
৫ অক্টোবৰৰ পৰা ভাৰতৰ মাটিত আৰম্ভ হ’ব এদিনীয়া বিশ্বকাপ। ৮ অক্টোবৰত অষ্ট্ৰেলিয়াৰ প্ৰথমখন খেল। প্ৰতিদ্বন্দ্বী ভাৰত। পাঁচবাৰৰ বিশ্ব চেম্পিয়ন দলটোৱে আৰু এবাৰ বিশ্বকাপ জয় কৰাৰ লক্ষ্য ৰাখিব।
অষ্ট্ৰেলিয়াৰ ১৫ জনীয়া দল : পেট কামিন্স (অধিনায়ক), ষ্টিভ স্মিথ, এলেক্স কেৰী, জোছ ইংলিছ, শ্বেন এবট, এষ্টন এগাৰ, কেমেৰন গ্ৰীণ, জোছ হেজলউড, ট্ৰেভিছ হেড, মিচেল মাৰ্ছ, গ্লেন মেক্সৱেল, মাৰ্কাছ ষ্ট’ইনিছ, ডেভিদ ৱাৰ্নাৰ, এডাম জাম্পা আৰু মিচেল ষ্টাৰক।
Continue Reading
