ডিজিটেল ডেস্কঃ কোৱা হয় যে ভাৰতীয় মহিলা অনন্য। আধুনিক ভাৰতৰ নিৰ্মাণত মহিলাসকলৰ বৰঙণি অপৰিসীম। সফলতাৰ ধাৰা অব্যাহত আছে ভাৰতৰ মহিলা উদ্যোগপতিসকলৰো। ইন্দ্ৰ নুয়ী, ফালগুনি নাইৰ, কিৰণ মজুমদাৰ শ্ব’, ৰোশ্নি নাদাৰকে ধৰি কেইবাগৰাকী উদ্যোপতিৰ বাবে আজি দেশ গৌৰৱান্বিত। ভাৰতীয় ব্যৱসায় জগতত এই মহিলাসকলৰ ৰাজত্ব মুকেশ আম্বানী, গৌতম আদানীতকৈ কম নহয়! এই প্ৰতিবেদনত দেশৰ নাৰী শক্তিৰ ওপৰত আলোকপাত কৰা হৈছে।
কিৰণ মজুমদাৰ শ্ব'। তেওঁ বায়কন লিমিটেডৰ অধ্যক্ষ আৰু প্ৰতিষ্ঠাপক। দেশৰ এগৰাকী মহিলা কোটিপতি। ১৯৭৮ চনত কিৰণে নিজৰ কোম্পানী গঢ়ি তুলিছিল। সেই কোম্পানীৰে তেওঁ সফলতাৰ শিখৰত উপনীত হৈছে। বাণিজ্যিক আলোচনী ফৰ্বছৰ এক প্ৰতিবেদন অনুসৰি, কিৰণৰ বায়’ফাৰ্মাচিউটিকেল কোম্পানী (যিটোৱে বায়’লজিকেল প্ৰস্তুত কৰে) ৰাজহৰ হিচাপত ভাৰতৰ ভিতৰতে সৰ্বাধিক। কিৰণে ১৯৮৯ চনত ‘পদ্মশ্ৰী’ লাভ কৰে। ২০০৫ চনত 'পদ্মভূষণ' লাভ কৰে। তেওঁৰ সম্পত্তিৰ পৰিমাণ আকাশলংঘী। ২০২২ চনৰ হিচাপ অনুসৰি কিৰণৰ মুঠ সম্পত্তি প্ৰায় ৩৬ হাজাৰ কোটি।
উৰৱী এ পিৰামল। স্বামী অশোক পিৰামলৰ মৃত্যুৰ পিছত উৰৱীয়ে ব্যৱসায় জগতত প্ৰৱেশ কৰাৰ সিদ্ধান্ত লয়। বছৰটো আছিল ১৯৮৪ চন। তেতিয়াৰ পৰা তেওঁ অকলেই ব্যৱসায়টো পৰিচালনা কৰি আহিছে। ব্যৱসায় পৰিচালনা কৰাৰ সময়ত উৰৱীয়ে বহু বাধাৰ সৈতে মোকাবিলা কৰিবলগীয়া হৈছিল। উদাহৰণস্বৰূপে ২০০৫ চনত পৰিয়ালটো বিচ্ছেদ হোৱাৰ পিছত তেওঁ ক্ষতিৰ সন্মুখীন হ’বলগীয়া হৈছিল। কিন্তু তেওঁ হাৰ নামানিলে। ৬ বছৰৰ ভিতৰতে তেওঁ ব্যৱসায়িক লাভৰ মুখখন দেখিলে। ‘বিজনেছ ৱৰ্ল্ড’ আলোচনীৰ সূত্ৰ অনুসৰি ২০২২ চনলৈকে উৰৱীৰ বাৰ্ষিক দৰমহা আছিল ১০ কোটি।
ৰোশ্নি নাদৰ মালহোত্ৰা। এইচ চি এল টেকন’লজিছৰ শীৰ্ষত থকা প্ৰথমগৰাকী মহিলা হিচাপে জিলিকি উঠিছে ৰোশ্নি নাদৰ মালহোত্ৰাই। ব্যৱসায়ী পৰিয়ালত ডাঙৰ-দীঘল হৈছিল। গতিকে পিছত ৰোশ্ণীয়ে পৰিয়ালৰ ব্যৱসায়ৰ লগত জড়িত হৈ পৰিল। এইচ চি এলৰ প্ৰতিষ্ঠাপক শিৱ নাদাৰৰ একমাত্ৰ কন্যা ৰোশনী। ২০২০ চনত ফৰ্বছৰ বিশ্বৰ ১০০ গৰাকী শক্তিশালী মহিলাৰ তালিকাত ৫৫ নম্বৰ স্থান লাভ কৰিছিল ৰোশনীক। তেওঁ দিল্লীত ডাঙৰ-দীঘল হৈছিল। বসন্ত ভেলী স্কুলত পঢ়িছিল। পিছলৈ তেওঁ নৰ্থৱেষ্টাৰ্ণ বিশ্ববিদ্যালয়ৰ পৰা স্নাতক ডিগ্ৰী লাভ কৰে। কেলগ স্কুল অৱ মেনেজমেণ্টৰ পৰাও এম বি এ উত্তীৰ্ণ হয়। ‘ইকনমিক টাইমছ’ৰ সূত্ৰ অনুসৰি, ২০২২ চনৰ হিচাপ অনুসৰি ৰোশনীৰ মুঠ সম্পত্তিৰ পৰিমাণ ৫৪ হাজাৰ ৮৫০ কোটি।
ফালগুনি নাইৰ। জনপ্ৰিয় প্ৰসাধন সামগ্ৰী কোম্পানী 'নাইকা'ৰ প্ৰতিষ্ঠাপক। ফাল্গনীৰ দেউতাক আছিল এজন ব্যৱসায়ী। ‘বিজনেছ ষ্টেণ্ডাৰ্ড’ৰ এক প্ৰতিবেদন অনুসৰি, ২০২২ চনলৈকে ফালগুনিৰ মুঠ সম্পত্তিৰ পৰিমাণ ৫৬,০০০ কোটি টকা।
ইন্দ্ৰা নুয়ী। ভাৰতীয়-আমেৰিকান ইন্দ্ৰা নুয়ীয়েও ব্যৱসায়ত নিজৰ নাম উজলাই তুলিছে। ২০১৮ চনলৈকে তেওঁ পেপচিকোৰ চিইঅ’ৰ পদত অধিষ্ঠিত আছিল। ১৯৯৪ চনত তেওঁ এই সংগঠনত যোগদান কৰে। ২০০৬ চনত তেওঁ কোম্পানীটোৰ চিইঅ’ হয়। ২০১৮ চনৰ ৬ আগষ্টত মুখ্য কাৰ্যবাহী বিষয়াৰ পদৰ পৰা পদত্যাগ কৰে। ২০১৯ চনলৈকে তেওঁ সংগঠনটোৰ অধ্যক্ষৰ পদত অধিষ্ঠিত আছিল। ইন্দ্ৰাৰ কাৰ্যকালত কোম্পানীটোৰ বিক্ৰী ৮০ শতাংশ বৃদ্ধি পায়। তেওঁৰো আছে ধন-সম্পত্তিৰ পাহাৰ। ‘হিন্দুস্তান টাইমছ’ৰ প্ৰতিবেদন অনুসৰি, ইন্দ্ৰাৰ মুঠ সম্পত্তিৰ পৰিমাণ ২ হাজাৰ কোটি টকাতকৈও অধিক।
Continue Reading
