ডিজিটেল ডেস্ক: কঠোৰ আইন প্ৰণয়নৰ পাছতো দেশত বন্ধ হোৱা নাই বাল্যবিবাহ৷ বাল্যবিবাহ প্ৰতিৰোধৰ বাবে চৰকাৰ-প্ৰশাসনে কঠোৰ ব্যৱস্থা গ্ৰহণ কৰিছে যদিও দেশৰ ভিন্ন প্ৰান্তত চলি আছে বাল্যবিবাহ৷
দেওবাৰে আৰক্ষীয়ে জনোৱা অনুসৰি বিহাৰৰ চিৱান জিলাত এগৰাকী ১১ বছৰীয়া কিশোৰীক বিবাহ কৰোৱাৰ অভিযোগত যৌন অপৰাধৰ পৰা শিশুৰ সুৰক্ষা আইনৰ অধীনত এজন ৪০ বছৰীয়া ব্যক্তিক গ্ৰেপ্তাৰ কৰা হৈছিল।
অভিযুক্তজনক মহেন্দ্ৰ পাণ্ডে বুলি চিনাক্ত কৰা হৈছে। এই সন্দৰ্ভত চিৱানৰ আৰক্ষী অধীক্ষক শৈলেশ কুমাৰ সিনহাই কয়, অভিযুক্ত মহেন্দ্ৰ কুমাৰক পকচো আইনৰ অধীনত গ্ৰেপ্তাৰ কৰা হৈছে। নাবালিকা ছোৱালীজনীক চিকিৎসা পৰীক্ষাৰ বাবে প্ৰেৰণ কৰা হৈছে। আৰক্ষীয়ে অনুসন্ধান অব্যাহত ৰাখিছে৷
নাবালিকাজনীৰ মাতৃয়ে অভিযোগ কৰিছিল যে অভিযুক্ত মহেন্দ্ৰ পাণ্ডেয়ে ঋণ পৰিশোধ নকৰাৰ বাবে তেওঁৰ জীয়েকক বলপূৰ্বক বিয়া কৰাইছিল। অৱশ্যে, অভিযুক্ত মহেন্দ্ৰ পাণ্ডেয়ে ওপৰোক্ত অভিযোগ অস্বীকাৰ কৰি কয় যে এয়া ছোৱালীজনীৰ মাতৃয়ে তেওঁৰ পৰা ধন উলিয়াবলৈ ব্যৱহাৰ কৰা কৌশল৷
মহেন্দ্ৰই কয়, মই ছোৱালীজনীৰ মাকৰ সন্মতিতহে বিবাহপাশত আবদ্ধ হৈছিলোঁ। এতিয়া ছোৱালীজনীৰ মাকে মোক ব্লেকমেইল কৰি আছে। তেওঁ টকা দাবী কৰিবলৈ আৰম্ভ কৰিছিল। আমাৰ মাজত কোনো ধৰণৰ ধনৰ লেনদেন নাই। মই ‘ফান্দ’ত পৰিছোঁ।
আনহাতে ভুক্তভোগী কিশোৰীগৰাকীয়ে কয় যে তেওঁৰ মাতৃয়ে অভিযুক্ত মহেন্দ্ৰ পাণ্ডেক এটা মিছা গোচৰত জড়িত কৰাই আছে। আমি দুয়ো মোৰ মাৰ সন্মতিতহে বিবাহপাশত আবদ্ধ হৈছিলোঁ, আমি একেলগে থাকিব বিচাৰো। আগতে মোৰ মায়ে সকলোবোৰ সম্পন্ন কৰিছিল, এতিয়া তেওঁ আমাক দুয়োকে জালত পেলাইছে৷
নাবালক ছোৱালীজনীৰ মাতৃৰ পৰা অভিযোগ পোৱাৰ পাছত আৰক্ষীয়ে মাইৰৱা আৰক্ষী থানাত এটা গোচৰ ৰুজু কৰে আৰু অভিযুক্ত মহেন্দ্ৰ কুমাৰক পকচো আইনৰ অধীনত গ্ৰেপ্তাৰ কৰে।
Continue Reading
