কিয় ভাৰতত ১১ হাজাৰ মানুহে আত্মহত্যা কৰিলে?

ডিজিটেল ডেস্ক: ক’ভিডোত্তৰ ভাৰতত বৃদ্ধি পাবলৈ ধৰিছে আত্মহত্যাৰ ঘটনা৷ পোহৰলৈ আহিছে এটাৰ পাছত আন এটা অন্ধকাৰ দিশ৷ সংসদৰ চলিত শীতকালীন অধিৱেশনত কালি কেন্দ্ৰীয় চৰকাৰে প্ৰকাশ কৰা এক তথ্যই চাঞ্চল্যৰ সৃষ্টি কৰিছে দেশত৷ ক’ভিড মহামাৰীৰ ফলত ২০২০ বৰ্ষত ভাৰতৰ কৃষিক্ষেত্ৰই সন্মুখীন হোৱা বিপৰ্যয়তকৈয়ো চলিত বৰ্ষত ব্যৱসায় ক্ষেত্ৰখনে সন্মুখীন হোৱা বিপৰ্যয় অধিকতৰ বুলি চৰকাৰী তথ্যত প্ৰকাশ পাইছে৷ মঙলবাৰে সংসদত কেন্দ্ৰীয় চৰকাৰে দাখিল কৰা তথ্য অনুসৰি ১১,৭১৬গৰাকী ব্যৱসায়ীয়ে ‌২০২০ বৰ্ষত আত্মহত্যা কৰিছে৷ আত্মহত্যাৰ মূল কাৰণ ক’ভিডে বিপৰ্যস্ত কৰা ব্যৱসায় বুলি তথ্যত প্ৰকাশ পাইছে৷

ক’ভিডৰ পূৰ্বৰ সময়তকৈ ভাৰতত আত্মহত্যাৰ এই হাৰ ২৯%লৈ বৃদ্ধি পাইছে৷ নেচনেল ক্ৰাইম ৰেকৰ্ডছ ব্যুৰ’ই প্ৰকাশ কৰা তথ্যত পোৱা গৈছে যে আত্মহত্যা কৰা ব্যৱসায়ীৰ সংখ্যাত ক্ষুদ্ৰ আৰু মজলীয়া ব্যৱসায়ীৰ সংখ্যাই অধিক৷ আন এটি উদ্বেগজনক কথা এয়ে যে অসমতো বৃদ্ধি পাবলৈ লৈছে আত্মহত্যাৰ সংখ্যা৷ অসমত ৩২৪৩ গৰাকী লোকে ক'ভিডকালত আত্মহত্যা কৰিছে৷ অসমত ক্ষুদ্ৰ ক্ষুদ্ৰ ব্যৱসায়ীবোৰে দিকবিদিক হেৰুৱাই পেলাইছে৷ হাতৰ পৰা কৰ্মসংস্থাপন নোহোৱা হৈ যোৱাত তেওঁলোকে দুৰ্ভাগ্যজনকভাৱে বাচি লৈছে আত্মহত্যাৰ পথ৷ কিয়নো, ব্যৱসায়ীসকলক সকাহ দিবলৈ কেন্দ্ৰ বা ৰাজ্য চৰকাৰৰ কোনো বিশেষ উদ্যোগ পৰিলক্ষিত হোৱা নাই৷ কেৱল মাত্ৰ এটা শ্ৰেণীৰ লোকক পাঁচ কেজিকৈ চাউল আৰু হিতাধিকাৰী সজাই চৰকাৰ চলাই গৈছে বিজেপিয়ে৷ নেচনেল ক্ৰাইম ৰেকৰ্ডছ ব্যুৰ’ই তেওঁলোকৰ অধ্যয়নত আত্মহত্যাৰ পৰিসংখ্যা অহা দুই-তিনিবছৰত আৰু বৃদ্ধি হ’ব আশংকা ব্যক্ত কৰিছে৷

উল্লেখযোগ্য যে, যোৱা বৰ্ষত বিশ্বজুৰি ক’ভিড-১৯ মহামাৰীয়ে ত্ৰাসৰ সৃষ্টি কৰিছিল৷ ভাৰতকো চুই গৈছিল সেই ধুমুহাই৷ ভাৰতত এই পৰ্যন্ত ক’ভিডত প্ৰাণ হেৰুৱাইছে ৪ লাখ ৬৯ হাজাৰ ২৪৭ গৰাকী লোকে৷ সৰ্বস্বান্ত হৈছে কোটিৰো অধিক লোক৷ ক’ভিডসৃষ্ট পৰিস্থিতিত সংস্থাপন হেৰুৱাইছে ১২.২ কোটি ভাৰতীয়ই৷ পৰিসংখ্যা হিচাপত চাবলৈ গ’লে ৮০% ভাৰতীয় নাগৰিকে হেৰুৱাইছে তেওঁলোকৰ বৃত্তি (তথ্যঃ ফাৰ্ষ্টপোষ্ট, ২ ফেব্ৰুৱাৰী, ২০২১)৷ ক’ভিডৰ বাবে ভাৰতত প্ৰথমটো লকডাউন আৰম্ভ হৈছিল ২০২০ চনৰ ২৫ মাৰ্চত৷ ঘোষণা কৰিছিল প্ৰধানমন্ত্ৰী নৰেন্দ্ৰ মোদীয়ে৷ লকডাউনত ঘৰতে আবদ্ধ হৈ পৰিছিল দেশবাসী৷ দেশৰ আগশাৰীৰ অৰ্থনীতিবিদ আৰু শুভচিন্তকে প্ৰধানমন্ত্ৰীৰ আকস্মিক লকডাউনত আশ্চৰ্য প্ৰকাশ কৰিছিল আৰু লকডাউনৰ ফলত সম্ভাৱ্য বিপৰ্যস্ত ভাৰত এখনৰ বিষয়ে উল্লেখ কৰিছিল৷ কিন্তু, সকলো পৰামৰ্শক নস্যাৎ কৰি আলোচনাৰ বাবে কোনো পৰিৱেশ নৰখাকৈয়ে অতি আকস্মিকভাৱে মোদীয়ে একক সিদ্ধান্তৰে লকডাউন ঘোষণা কৰিছিল৷

তাৰ পৰৱৰ্তী সময়ত উপৰ্যুপৰি লকডাউনে জোকাৰি গ'ল ভাৰতৰ সমাজ ব্যৱস্থাক৷ তচনচ হৈ পৰিল অৰ্থনীতি৷ বিমুদ্ৰাকৰণ আৰু জিএছটিয়ে বিধ্বস্ত কৰা ভাৰতীয় অৰ্থনীতিক ক’ভিড মহামাৰীয়ে বহু বছৰলৈ পিছুৱাই লৈ গ'ল৷ যোৱা বৰ্ষত পৰিস্থিতি এনে পৰ্যায় পাইছিলগৈ যে কাম হেৰুওৱা শ্ৰমিকে খোজ কাঢ়িয়েই পাৰ হৈছিল দেশৰ ইপাৰ-সিপাৰ৷

ৰে’লৰ আলিত পৰি লৈছিল শ্ৰমিকৰ ৰুটীৰ টুকুৰা৷ বিৰোধী দলক অপ্ৰাসংগিক কৰি তুলিব খোজা মানসিকতা আৰু পুঁজিপতিৰ তুষ্টিকৰণত ব্যস্ত থকা কেন্দ্ৰস্থ চৰকাৰখনৰ দেশৰ নাগৰিকৰ প্ৰতি কোনো দায়বদ্ধতা দেখিবলৈ পোৱা নগ’ল৷ বিত্তমন্ত্ৰী নিৰ্মলা সীতাৰমনে অৰ্থনৈতিক পেকেজ ঘোষণা কৰিলে৷ পেকেজ মাথোঁ ঘোষণাতেই ৰ'ল৷ বাস্তৱত ভোকে দহিলে জনতাক৷ ঋণ লৈ ঘৰ চলাবলগীয়া পৰ্যায় আহি পৰিল নাগৰিকৰ৷ আকৌ, ঋণ লৈ ঋণ পৰিশোধ কৰিবলৈও হাতৰ পৰা ক'ভিডে কাঢ়ি নিলে সংস্থাপন৷ ক'ভিড আৰু চৰকাৰে ভুলভাৱে প্ৰয়োগ কৰা নীতিয়ে কাঢ়ি নিলে দুবেলাৰ দুমুঠি, নিশাৰ ঘুমটি৷ এতিয়া ভাল দিনলৈ বাট চাই চাই প্ৰমাদ গণিছে ভাৰতৰ ১৩০ কোটি জনগণে৷

আৰু পঢ়কঃ তৰুণ প্ৰজন্মত বৃদ্ধি পাইছে বিবাহ বিচ্ছেদ! আঁৰত কি কাৰণ?