ককাদেউতা হ'ল উদিত নাৰায়ণ; বোৱাৰী শ্বেতাই জন্ম দিলে পুত্ৰ নে কন্যা সন্তান?

ডিজিটেল ডেস্কঃ ককাদেউতা হ'ল বলীউডৰ জনপ্ৰিয় কণ্ঠশিল্পী উদিত নাৰায়ণ। প্ৰথমবাৰলৈ ককা হ'বলৈ পাই আনন্দত আত্মহাৰা হৈ পৰিছে কণ্ঠশিল্পী গৰাকী। উদিত নাৰায়ণৰ পুত্ৰ আদিত্য নাৰায়ণে সকলোকে জনায় এই ভাল খবৰ। উদিত নাৰায়ণৰ বোৱাৰী তথা আদিত্যৰ পত্নী শ্বেতা আগৰৱালে জন্ম দিয়ে এটি কন্যা সন্তান। আদিত্য নাৰায়ণে কয় যে, ''সকলোৱে কৈ আছিল আমাৰ এটা পুত্ৰ হ'ব। কিন্তু মই ঈশ্বৰক মনে মনে প্ৰাৰ্থনা কৰিছিলোঁ যে আমাৰ এজনী ছোৱালী জন্ম হ'ব লাগে। মই ভাবো যে ছোৱালীবোৰ পিতৃৰ আটাইতকৈ মনৰ ওচৰৰ। মই বহুত সুখী যে আমাৰ ঘৰলৈ লক্ষ্মী আহিছে। মোৰ পিতৃ-মাতৃও এই কথাত বহুত সুখী। মই আৰু শ্বেতা পতি-পত্নীৰ পৰা পিতৃ-মাতৃ হ'বলৈ পাই এতিয়া অত্যন্ত গৌৰৱান্বিত।" আদিত্যই লগতে কয় যে ''শ্বেতাৰ প্ৰতি মোৰ মৰম আৰু সন্মান দুগুণ হৈছে। এগৰাকী মহিলাই গৰ্ভধাৰণৰ পৰ্যায়ত বহুতো কষ্টৰ মাজেৰে এটি কেঁচুৱা জন্ম দিয়ে।" উল্লেখ্য যে শ্বেতাই যোৱা ২৪ ফেব্ৰুৱাৰীত মুম্বাইৰ এখন চিকিৎসালয়ত কন্যা সন্তানটিৰ জন্ম দিয়ে। কথাটো ইমানদিনে লুকুৱাই ৰাখি আজিহে সংবাদ মাধ্যমক জনায় নাৰায়ণ পৰিয়ালে। ২০২০ চনৰ ১ ডিচেম্বৰত ডেৰ বছৰৰ ডাঙৰ শ্বেতাৰ সৈতে বিবাহপাশত আবদ্ধ হৈছিল আদিত্য নাৰায়ণ। ককাক উদিত নাৰায়ণ আৰু নতুনকৈ পিতৃ-মাতৃ হোৱা আদিত্য-শ্বেতাক শুভকামনাৰে উপচাই পেলাইছে বলীউডৰ শিল্পীসকলৰ লগতে অনুৰাগীসকলে। আৰু পঢ়কঃ মছজিদত আত্মঘাতী বিস্ফোৰণ! ৩০ জনৰ মৃত্যু,৫০ৰো অধিক গুৰুতৰভাৱে আহত