কৰ্ণাটকৰ হিজাব কাণ্ডৰ আঁৰত আল-কায়দা! অপপ্ৰচাৰ কৰি জৰিমণাৰ সন্মুখীন নিউজ১৮ ইণ্ডিয়া

ডিজিটেল ডেস্কঃ দ্যা নিউজ ব্ৰ’ডকাষ্টিং এণ্ড ডিজিটেল ষ্টেণ্ডাৰ্ডছ অথ’ৰিটী, চমুকৈ এনবিডিএছএই জৰিমণা বিহিছে নিউজ১৮ ইণ্ডিয়া চেনেলটোক। অমন চোপ্ৰা নামৰ এগৰাকী এংকৰে আয়োজন কৰা এটা শ্ব’ৰ ভিত্তিত এই শাস্তি প্ৰদান কৰা হৈছে।

উল্লেখ্য যে কৰ্ণাটকৰ হিজাব নিষিদ্ধ কাণ্ডৰ সময়ছোৱাতে বিষয়টোক লৈ নিউজ চেনেলটোত এটা অনুষ্ঠান হৈছিল। ৮ এপ্ৰিলৰ সেই অনুষ্ঠানটোত এংকৰ অমন চোপ্ৰাই হিজাব সমৰ্থনকাৰীসকলক ‘হিজাবী গেং’ হিচাপে অভিহিত কৰিছিল।

কেৱল সেয়াই নহয়, হিজাব সমৰ্থনকাৰীসকলক ‘আল-কায়দা গেং’ হিচাপে আখ্যা দিয়া হৈছিল। কৰ্ণাটকৰ হিজাব কাণ্ডত আল কায়দাৰ হাত আছে বুলি ইয়াৰ দ্বাৰা অপপ্ৰচাৰ চলোৱা হৈছিল।

তাৰপাছতে এনবিডিএছএৰ ওপৰত আপত্তি প্ৰদৰ্শন কৰা হয়। অৱশেষত বুধবাৰে এনবিডিএছএই সমস্ত অভিযোগ বিচাৰ কৰি চেনেলটোৰ ওপৰত ৫০ হেজাৰ টকাৰ জৰিমণা বিহিছে। তদুপৰি সাত দিনৰ ভিতৰত উক্ত অনুষ্ঠানটো ৱেবচাইটৰ পৰা আঁতৰাবলৈও নিৰ্দেশ দিছে।