ডিজিটেল ডেস্কঃ নিৰ্বাচনমুখী কৰ্ণাটকত আজি এক ভয়ংকৰ হেলিকপ্টাৰ দুৰ্ঘটনা সংঘটিত হোৱাৰ উপক্ৰম ঘটিছিল যদিও সৌভাগ্যবশতঃ হেলিকপ্টাৰ খনে জৰুৰী অৱতৰণ কৰিবলৈ সক্ষম হয়৷ কৰ্ণাটক কংগ্ৰেছৰ মুৰব্বী ডি কে শিৱকুমাৰে নিৰ্বাচনী প্ৰচাৰৰ বাবে হেলিকপ্টাৰেৰে যাত্ৰা কৰাৰ সময়তে এটা চৰায়ে হেলিকপ্টাৰ খনত খুন্দা মাৰে৷ ফলত হেলিকপ্টাৰ খনৰ উইণ্ডশ্বিল্ড ভাগি যায়।
এনে অঘটনৰ পিছতে পাইলটজনে হেলিকপ্টাৰ খন জৰুৰীভাবে অৱতৰণ কৰিবলৈ বাধ্য হয়৷
আৰক্ষী সূত্ৰই জনোৱা অনুসৰি মঙলবাৰে দুপৰীয়া প্ৰায় ১২ বজাত হেলিকপ্টাৰখনে জাক্কুৰৰ পৰা উৰা মাৰিছিল। কিন্তু মাজ আকাশতে হেলিকপ্টাৰ খনে এটা চৰাইৰ সৈতেখুন্দা খায়। ঘটনাটো কোলাৰৰ ওচৰৰ মুলবাগিলুত সংঘটিত হয়।
প্ৰাৰম্ভিক প্ৰতিবেদন অনুসৰি, হেলিকপ্টাৰখনত এটা ঈগলে খুন্দা মাৰিছিল৷ কিন্তু সৌভাগ্যক্ৰমে কংগ্ৰেছ নেতা শিৱকুমাৰ আৰু হেলিকপ্টাৰৰ পাইলট জনৰ কথমপি প্ৰাণৰক্ষা পৰে৷
হেলিকপ্টাৰ খনে জৰুৰী অৱতৰণ কৰাৰ পিছতে শিৱকুমাৰে নিৰ্বাচনী জনসভালৈ ৰাওনা হয়। ৰাজ্যিক কংগ্ৰেছৰ সূত্ৰই কৈছে যে শিৱকুমাৰ আৰু হেলিকপ্টাৰত থকা সকলো লোক সুৰক্ষিত হৈ আছে৷
Continue Reading
