ডিজিটেল ডেস্কঃ অৱশেষত ক্ষমা বিচাৰিলে ইউক্ৰেইনে। ইউক্ৰেইনৰ প্ৰতিৰক্ষা মন্ত্ৰালয়ৰ এক টুইটে দেওবাৰৰ পৰা ছ’চিয়েল মিডিয়াত বিতৰ্কৰ ধুমুহাৰ সৃষ্টি কৰিছিল। ঘটনাৰ দুদিন পিছত ৰাষ্ট্ৰপতি ভল’ডিমাইৰ জেলেনস্কিৰ চৰকাৰে হিন্দুসকলৰ ধৰ্মীয় আৱেগক আঘাত দিয়াৰ বাবে ক্ষমা বিচাৰিলে।
ইউক্ৰেইনৰ উপ-বিদেশ মন্ত্ৰী ইমিন জাপাৰোভাই মঙলবাৰে এই ঘটনাৰ বাবে ক্ষমা বিচাৰি কয় যে, “আমাৰ প্ৰতিৰক্ষা মন্ত্ৰালয়ে দেৱী কালিৰ বিকৃত ছবিখন ছ’চিয়েল মিডিয়াত পোষ্ট কৰাৰ বাবে দুখ প্ৰকাশ কৰিছে। ইউৰোপীয় দেশ হিচাপে আমি ভাৰতৰ অনন্য সাংস্কৃতিক ঐতিহ্যক সন্মান কৰো। ভাৰতৰ সহযোগিতাৰ শলাগ লওঁ। ইতিমধ্যে এই পোষ্টটো আঁতৰাই দিয়া হৈছে।''
ইয়াৰ উপৰিও শেহতীয়াকৈ ভাৰত ভ্ৰমণ কৰা ইমিনে টুইটাৰত লিখিছে, 'আমি ভাৰতৰ সৈতে সন্মান আৰু সহযোগিতাৰ পৰিৱেশ আৰু অধিক বৃদ্ধি কৰিবলৈ বদ্ধপৰিকৰ।'
প্ৰসংগক্ৰমে যোৱা দেওবাৰে ইউক্ৰেইনৰ প্ৰতিৰক্ষা মন্ত্ৰালয়ৰ টুইটাৰ হেণ্ডেলত দেখা গৈছিল কালীৰ ফটো। অৱশ্যে পোষ্টটোত ‘দেৱী কালী’ শব্দৰ কথা উল্লেখ কৰা হোৱা নাছিল। প্ৰয়াত হলিউডৰ অভিনেত্ৰী মেৰিলিন মনৰোৰ দৰেই ডিঙিত নৰমুণ্ডাৰ নেকেলেচ আৰু ওলাই থকা জিভাখন লৈ বৈ যোৱা স্কাৰ্টৰ ভংগীমাত থিয় হৈ থকা এগৰাকী মহিলাও কালিৰ সৈতে মিল থকা দেখা গৈছে। তাৰ পিছত ছচিয়েল মিডিয়াত বিতৰ্ক বিয়পি পৰে।
Continue Reading
