ডিজিটেল ডেস্ক: দ্বিতীয় বাৰৰ বাবে গৰ্ভৱতী আলিয়া ভাট! কন্যা ৰহাৰ বয়স মাত্ৰ তিনিমাহ। ইয়াৰ মাজতে মায়ানগৰীত নতুন নতুন জল্পনা-কল্পনাৰ চৰ্চালৈ আহিছে। শুনা যায় যে আলিয়া আকৌ গৰ্ভৱতী হৈছে। শেহতীয়াকৈ আলিয়াক স্বামী ৰণবীৰ কাপুৰৰ সৈতে মুম্বাইৰ এক অনুষ্ঠানত দেখা গৈছিল। আলিয়াই মাতৃ হোৱাৰ পাছত প্ৰথমবাৰৰ বাবে এক অনুষ্ঠানত অংশ লৈছিল। কিছুদিন পূৰ্বে অভিনেত্ৰীগৰাকীয়ে নিজৰ ব্ৰেণ্ডৰ কাপোৰৰ বাবে ফটো শ্বুটো কৰিছিল। তেতিয়াৰ পৰাই জল্পনা-কল্পনাৰ সৃষ্টি হৈছে। আলিয়াই দ্বিতীয়বাৰৰ বাবে ভাল খবৰ দিবলৈ ওলাইছে।
বিগত বৰ্ষৰ ১৪ এপ্ৰিলত ৰণবীৰ কাপুৰৰ সৈতে বিবাহপাশত আবদ্ধ হৈছিল অভিনেত্ৰীগৰাকীয়ে। ইয়াৰ পাছত জুন মাহত গম পোৱা গৈছিল যে আলিয়া মাতৃ হ’বলৈ ওলাইছে। নৱেম্বৰৰ প্ৰথম সপ্তাহত আলিয়াই জন্ম দিলে এটি কন্যা সন্তান। শেহতীয়াকৈ কাপুৰ দম্পতীহালে কন্যা ৰাহাৰ সৈতে ফুৰিবলৈ ওলাই যায়। যদিও তেওঁলোকে এতিয়াও ছোৱালীজনীৰ মুখখন ৰাজহুৱা কৰা নাই। ফটোগ্ৰাফাৰসকলক অনুৰোধ জনাইছে যে ৰাহাৰ দুবছৰ বয়স নোহোৱালৈকে ফটো নল’ব। ইফালে কাপুৰৰ একাংশ ঘনিষ্ঠ বন্ধুৱে কয় যে আলিয়াৰ গৰ্ভৱতী হোৱাৰ উৰাবাতৰি সম্পূৰ্ণ ভিত্তিহীন। অৱশ্যে এতিয়াও এই সন্দৰ্ভত আলিয়া আৰু ৰণবীৰে মুকলিকৈ একো প্ৰকাশ কৰা নাই।
গৰ্ভাৱস্থাত বিৰতি লোৱা নাছিল অভিনেত্ৰীগৰাকীয়ে। বৰঞ্চ ইটোৰ পিছত সিটো কামহে কৰিছে। তেওঁ হলিউডত ‘হাৰ্ট অৱ ষ্টোন’ ছবিখনৰ শ্বুটিং কৰিছিল, ‘ব্ৰহ্মাস্ত্ৰ' ছবিখনৰ প্ৰচাৰ কৰিছিল। অৱশ্যে ৰাহাৰ আগমনৰ পাছত বৰ্তমান অভিনেত্ৰীগৰাকীয়ে নিজৰ স্বাস্থ্যক বিশেষ গুৰুত্ব প্ৰদান কৰিছে। শীঘ্ৰে মুক্তি পাব তেওঁৰ নতুন ছবি ‘ৰকি ঔৰ ৰাণী কি প্ৰেম কাহানি’।
Continue Reading
