কৃষি আইনবিৰোধী যুঁজৰ অসমীয়া যোদ্ধাসকল

ডিজিটেল ডেস্কঃ ক্ষুধাতুৰ কৃষকৰ জয় হ’ল৷ বাতিল হ’ল বিতৰ্কিত তিনিওখন কৃষি আইন৷ কৃষকৰ ওচৰত হেওঁ মানি মোদী চৰকাৰেও কৃষি আইন বাতিল কৰিবলৈ বাধ্য হ’ল৷ প্ৰায় ডেৰ বছৰজোৰা আন্দোলনৰ সফল সমাপ্তি ঘটিল৷ কিন্তু এই আন্দোলনৰ নেপথ্যত আছিল আছিল আন বহুতো মানুহ, যি সকল আন্দোলনৰ লগত প্ৰত্যেক্ষভাৱে জড়িত হৈ পৰিছিল৷

দিল্লীৰ কৃষক আন্দোলনৰ নেতৃত্বত অসমৰ কেইজনমান প্ৰতিবাদী সত্বাও অংশগ্ৰহণ কৰিছিল৷ কিন্তু সেই লোক সকলৰ নাম অসমৰ সংবাদ মাধ্যমত আশানুৰূপ ধৰণে প্ৰচাৰ নাপালে৷ দিল্লীৰ কৃষক আন্দোলনত ভাগ লৈ অসমৰ কৃষকে আনকি জেল পৰ্যন্ত খাটিবলগীয়া হৈছিল, সেই কথাও সংবাদ মাধ্যমত প্ৰচাৰ নহল৷ দিল্লীৰ কৃষক আন্দোলনত অসমৰ হৈ ৫০ জনৰো অধিক লোকে দিল্লীত গৈ আন্দোলনত ভাগ লৈছিল আৰু তেওঁলোকৰ নেতৃত্ব বহন কৰিছিল ক্ৰমে- জয়ন্ত গগৈ, দীনেশ দাস, গজেন বৰ্মন, ছান মামুদ আৰু গোবিন্দ সি্নহাই৷

তেওঁলোক আটাইয়ে ‘নিখিল ভাৰত কৃষক সংগ্ৰাম সংঘ সমন্বয়ৰক্ষী সমিতি’ৰ সদস্য আছিল৷ নতুন দিল্লীৰ সিংঘু সীমাৰ টেক্টৰ ৰেলীত অসমৰ মুঠ ১৪ জন কৃষকে অংশগ্ৰহণ কৰিছিল আৰু তেওঁলোকৰ নেতৃত্ব বহন কৰিছিল গহপুৰৰ কৃষক জয়ন্ত গগৈয়ে৷ আন্দোলন সামৰি যেতিয়া তেওঁলোক অসমলৈ উভতি আহিছিল তেতিয়া তেওঁলোকক বৰঝাৰ বিমান বন্দৰত কোভিড বিধিৰ ভংগ কৰাৰ অভিযোগত অসম আৰক্ষীয়ে তেওঁলোকক গ্ৰেপ্তাৰ কৰে আৰু তেওঁলোকে ১৫ দিন কাৰাবাস খাটিব লগা হৈছিল৷

কৃষি আইন বাতিল হোৱাৰ পাছত বৰ্তমান আটাইকেইজন কৃষক নেতা সন্তুষ্ট৷ কৃষক নেতা জয়ন্ত গগৈয়ে সংবাদ মাধ্যমৰ আগত ক’য় যে ‘অৱশেষত কৃষকৰ জয় হল৷ মোদী চৰকাৰৰ বিৰুদ্ধে গণতান্ত্ৰিক আন্দোলন কৰা বাবেই শত্ৰুৰ দৰে ব্যৱহাৰ কৰি কাৰাগাৰলৈ প্ৰেৰণ কৰিছিল৷ অৱশেষত প্ৰধানমন্ত্ৰীয়ে ভুল স্বীকাৰ কৰি আইন বাতিল কৰা কথা ঘোষণা কৰাত আদৰণি জনাইছো৷’ আনহাতে, ক’লা আইন বাতিলৰ দাবীত সিংঘু সীমান্তত অনুষ্ঠিত প্ততিবাদী সভাত বিজনীৰ কৃষক গজেন বৰ্মণেও অংশগ্ৰহণ কৰিছিল৷ বৰপেটাৰ কলগাছিয়াৰ কৃষক ছান মামুদেও নিখিল ভাৰত কৃষক সভাৰ বেনাৰত কৃষক আন্দোলনত অংশগ্ৰহণ কৰিছিল৷ গোলাঘাটৰ সৰুপথাৰৰ কৃষক গোবিন্দ সিন্হাই ৪৮ জন কৃষকক লৈ উত্তৰ প্ৰদেশৰ মহা পঞ্চায়তত অংশগ্ৰহণ কৰিছিল৷