ডিজিটেল ডেস্কঃ দিল্লীত কৃষকৰ প্ৰতিবাদত অংশগ্ৰহণ কৰা আন এজন কৃষকৰ মৃত্যু ঘটিছে। পঞ্জাৱ আৰু হাৰিয়ানাৰ সীমান্তত কৃষকসকলৰ প্ৰতিবাদৰ সময়ত দৰ্শন সিং নামৰ এজন ৬২ বছৰীয়া কৃষকৰ মৃত্যু ঘটে। আৰক্ষীয়ে প্ৰকাশ কৰা মতে হৃদৰোগত আক্ৰান্ত হৈ তেওঁৰ মৃত্যু হৈছে। শুক্ৰবাৰে পুৱা প্ৰতিবাদৰ সময়ত তেওঁ অসুস্থ হৈ পৰিছিল। পিছত তেওঁক চিকিৎসালয়ত মৃত ঘোষণা কৰা হয়।
ইয়াৰ ফলত চলিত কৃষকৰ প্ৰতিবাদত পাঁচজন কৃষকৰ মৃত্যু ঘটিছে। ইয়াৰ পূৰ্বে বুধবাৰে শম্ভু সীমান্তত এজন ২৪ বছৰীয়া কৃষকৰ আৰক্ষীৰ গুলীত মৃত্যু হৈছিল। দেওবাৰে সন্ধিয়া হৃদৰোগত আক্ৰান্ত হৈ আন এজন ৭০ বছৰীয়া কৃষকৰ মৃত্যু ঘটিছিল। ১৬ ফেব্ৰুৱাৰীত প্ৰতিবাদৰ মাজতে ৭৮ বছৰীয়া জিয়ান সিঙৰ মৃত্যু হৈছিল। ইয়াৰ মাজতে আন এজন কৃষকৰ মৃত্যু হয়।কেৱল কৃষকেই নহয়, আৰক্ষী কৰ্মীও এই প্ৰতিবাদ বন্ধ কৰিবলৈ চেষ্টা কৰোঁতে আহত হৈ মৃত্যুহৰণ কৰিছে।
বৃহস্পতিবাৰে নিশা আম্বালাত প্ৰতিবাদকাৰী কৃষকসকলৰ সৈতে সংঘৰ্ষত দুজন আৰক্ষী নিহত হয় বুলি হাৰিয়ানা আৰক্ষীয়ে প্ৰকাশ কৰিছে। আহত আৰক্ষীৰ সংখ্যা ত্ৰিশতকৈও অধিক বুলি জানিব পৰা গৈছে। আৰক্ষীয়ে জনোৱা অনুসৰি প্ৰতিবাদকাৰীসকলে দিল্লীত বলপূৰ্বক প্ৰৱেশ কৰিবলৈ চেষ্টা কৰাৰ ফলত উত্তেজনা বৃদ্ধি পাইছিল। দুয়োপক্ষৰ মাজত সংঘৰ্ষই এক উত্তপ্ত পৰিস্থিতিৰ সৃষ্টি কৰিছিল। প্ৰতিবাদকাৰীসকলক বাধা দিবলৈ চেষ্টা কৰি থকা অৱস্থাত দুজন আৰক্ষী বিষয়া নিহত হয়।
ইফালে হাৰিয়ানা আৰক্ষীয়ে ৰাষ্ট্ৰীয় সুৰক্ষা আইনৰ অধীনত প্ৰতিবাদকাৰী কৃষকসকলৰ বিৰুদ্ধে গোচৰ ৰুজু কৰাৰ ভাবুকি দিছে। হাৰিয়ানা চৰকাৰে এইবুলিও কৈছে যে যদি তেওঁলোকে প্ৰতিবাদৰ নামত ৰাজহুৱা সম্পত্তি ধ্বংস কৰে তেন্তে তেনে কৃষকৰ সম্পত্তি জব্দ কৰা হ’ব। অৱশ্যে আৰক্ষীৰ এনে সতৰ্কবাণীৰ পিছতো কৃষকৰ প্ৰতিবাদ বন্ধ হোৱা নাই।
Continue Reading
