ডিজিটেল ডেস্কঃ মানুহ আৰু কুকুৰৰ সম্পৰ্ক অতি মধুৰ। গৰাকীৰ প্ৰতি অতি নিষ্ঠাৱান হোৱা বাবে কুকুৰক প্ৰভুভক্ত বুলি কোৱা হয়। গৰাকীৰ মৃত্যুৰ পাছত বছৰ বছৰ ধৰি ৰে’ল ষ্টেচনত মালিকৰ বাবে অপেক্ষা কৰি থকা জাপানৰ নিষ্ঠাবান কুকুৰ হাচিকোৰ হৃদয়বিদাৰক কাহিনীটো মনত আছেনে? দশক দশক ধৰি এই কাহিনীয়ে প্ৰমাণ কৰি আহিছে যে কুকুৰ সঁচাকৈয়ে ‘মানুহৰ বেষ্ট ফ্ৰেণ্ড’ উপাধিটোৰ যোগ্য। শেহতীয়াকৈ ছ’চিয়েল মিডিয়াত ভাইৰেল হৈ পৰিছে আফগানিস্তানৰ এটা কুকুৰৰ কাহিনী। আমি একেবাৰে নিশ্চিত যে কুকুৰটোৰ কাহিনীয়ে আপোনাৰো মন সেমেকাই তুলিব।
যোৱা বুধবাৰে পুৱা পূব আফগানিস্তানৰ গ্ৰাম্য, পাহাৰীয়া অঞ্চলত হোৱা প্ৰবল ভূমিকম্পত হাজাৰ হাজাৰ লোকৰ মৃত্যু হোৱাৰ লগতে হাজাৰ হাজাৰ লোক আহত হয়। ৬.১ প্ৰাবল্যৰ এই ধ্বংসাত্মক ভূমিকম্পত বহু ঘৰ-দুৱাৰো বিধ্বস্ত হৈ পৰে। এনে বহু ধ্বংসপ্ৰাপ্ত ঘৰ আৰু আশ্ৰয়হীন পৰিয়ালৰ মাজত মানুহে লক্ষ্য কৰিছে যে এটা কুকুৰে নিয়মিতভাৱে এটা নিৰ্দিষ্ট ঠাইলৈ গৈ কিবা এটা বিচাৰি থাকে।
উল্লেখ্য যে এই কুকুৰটোৰ ঘৰৰ প্ৰতিজন ব্যক্তিয়েই ভূমিকম্পত নিহত হৈছিল। কেনেবাকৈ প্ৰাণ ৰক্ষা পৰিছিল কুকুৰটোৰ। ওচৰ-চুবুৰীয়াই কুকুৰটোৰ চোৱা-চিতা কৰি আছে যদিও ভূমিকম্পত ভাঙি চূৰমাৰ হোৱা ঘৰটোলৈ ঘূৰি আহি সদায় কান্দি থাকে কুকুৰটোৱে। ঘৰৰ মানুহক বিচাৰি হাহাকাৰ কৰে কুকুৰটোৱে। মালিকক বিচাৰি হাহাকাৰ কৰি থকা কুকুৰটোৰ হৃদয়বিদাৰক ফটোখনে সকলোকে আৱেগিক কৰি তুলিছে। বৰ্তমান বহুতে স্বেচ্ছাই কুকুৰটোৰ দায়িত্ব ল'ম বুলি আগবাঢ়ি আহিছে। কিছুমানে মন্তব্য কৰিছে যে কুকুৰটোৱে যাতে পুনৰ আগৰ মালিকৰ দৰেই মৰমীয়াল আৰু যত্নৱান মালিক বিচাৰি পায়।
আনহাতে বৈদেশিক পৰিক্ৰমা মন্ত্ৰালয়ৰ মুখপাত্ৰ অৰিন্দম বাগচিয়ে কয় যে আফগানিস্তানৰ জনসাধাৰণক সহায় কৰিবলৈ ভাৰতে কাবুললৈ দ্বিতীয়টো সাহায্য প্ৰেৰণ কৰিছে। ভাৰতে কাবুললৈ প্ৰেৰণ কৰা সাহায্যত অত্যাৱশ্যকীয় সকলোখিনি সামগ্ৰীয়ে আছে।
