ক’ভিডৰ বিৰুদ্ধে যুঁজিবলৈ আৰু এখোজ আগবাঢ়িল ভাৰত;জানক সৱিশেষ

ডিজিটেল ডেস্কঃ সমগ্ৰ বিশ্ববাসীয়ে ক’ভিড ১৯ মহামাৰীৰ বিৰুদ্ধে আজিও যুঁজি আছে৷ অৱশ্যে পূৰ্বৰ তুলনাত ক’ভিডৰ সংক্ৰমণ হ্ৰাস পাইছে যদিও ক’ভিডৰ বিৰুদ্ধে যুঁজখন এতিয়াও শেষ হোৱা নাই৷ ভেকচিনৰ উদ্ভাৱনৰ পাছত বিশ্ববাসীয়েও এই ভাইৰাছৰ সৈতে মোকাবিলা কৰিবলৈ আৰু অধিক শক্তি পালে৷ ইতিমধ্যে ভাৰতৰ প্ৰায় দুই তৃতীয়াংশ লোকে ভেকচিনৰ প্ৰথম পালি ল’বলৈ সক্ষম হৈছে৷

দেশৰ চিকিৎসক বিশেষজ্ঞসকলেও সদায়েই ক’ৰোনা মহামাৰীৰ সৈতে মোকাবিলা কৰিবলৈ নিত্য নতুন কৌশল উদ্ভাৱন কৰিছে৷ শেহতীয়াকৈ ভাৰতৰ চিকিৎসা শাস্ত্ৰই দেশবসীলৈ আন এক সুখবৰ কঢ়িয়াই আনিছে৷ ভাৰতৰ বৈজ্ঞানিক আৰু ঔদ্যোগিক গৱেষণা পৰিষদ (চি.এছ.আই.আৰ.) ক’ভিড ১৯ চিকিৎসাৰ বাবে ‘ম’লনুপিৰাভিৰ’ নামৰ এবিধ বিশেষ ঔষধ প্ৰস্তুত কৰি উলিয়াইছে৷এই ঔষধবিধ বিশেষকৈ প্ৰাপ্তবয়স্কসকলৰ মাজৰ যিসকল লোকে ক’ভিড ১৯ ৰ দ্বাৰা গুৰুতৰভাৱে আক্ৰান্ত হৈ স্বাস্থ্যজনিত সমস্যাত ভুগে তেওঁলোকে ব্যৱহাৰ কৰিব পাৰিব৷

এই বিশেষ ঔষধবিধ ব্যৱহাৰে মানুহক নিশ্চিত মৃত্যুমুখৰ পৰা ৮৯% হ্ৰাস কৰাৰ সম্ভাৱনা আছে বুলি স্বাস্থ্য বিশেষজ্ঞসকলে দাবী কৰিছে৷ চি.এছ.আই.আৰ. মুৰব্বী ড০ ৰাম বিশ্বকৰ্মাই দেশৰ সংবাদ মাধ্যমৰ আগত জনাই যে, ‘ক’ভিডৰ বিৰুদ্ধে যুঁজ দিবলৈ এই ঔষধবিধ যথেষ্ট ফলদায়ক হ’ব আৰু এই ঔষধক লৈ আমি যথেষ্ট আশাবাদী৷ অতি শীঘ্ৰে এই ঔষধবিধে আন্তৰাষ্ট্ৰীয় স্বীকৃতি লাভ কৰাৰ পূৰ্ণ সম্ভাৱনা আছে আৰু তাৰ পাছতে দেশৰ সাধাৰণ নাগৰিকৰ বাবে ঔষধবিধ উপলদ্ধ হ’ব৷

ঔষধবিধক লৈ এতিয়াও পৰীক্ষাগাৰত বিভিন্ন পৰীক্ষা-নিৰীক্ষা চলি আছে আৰু আগন্তুক এমাহৰ ভিতৰত ঔষধবিধে স্বীকৃতি পাব৷ সংস্থাটোৱে ইতিমধ্যে ঔষধবিধ প্ৰস্তুত কৰিবলৈ ৫ টা ঔষধ কোম্পানীৰ সৈতে চুক্তিবদ্ধ হৈছে৷ তদুপৰি ঔষধবিধ প্ৰস্তুতকাৰী আন কেইবাটাও কোম্পানীক সংস্থাটোৱে ভৱিষ্যতে অনুজ্ঞাপত্ৰ দিয়াৰ সম্ভাৱনা আছে৷ ঔষধবিধ ভাৰতীয় বজাৰতো কম মূল্যতে উপলদ্ধ হ’ব বুলি সংস্থাটোৱে জানিবলৈ দিছে৷