লাডাখত দলং নিৰ্মাণ কৰিছে চীনে, কিদৰে সাজু ভাৰত ?

নতুন দিল্লীঃ ভাৰত আৰু চীনৰ মাজত যে কোনো ধৰণৰ সৌহাৰ্দপূৰ্ণ সম্পৰ্ক নাই সেই কথা পুনৰবাৰ দোহৰাৰ প্ৰয়োজন নাই। সময়ে সময়ে দুয়োখন দেশৰ মাজত সৃষ্টি হৈ আহিছে নানা বিবাদৰ। ভাৰতীয় সেনাৰে চীনা সৈন্যৰ মুখামুখী সংঘৰ্ষত প্ৰাণ হেৰুৱাবলগীয়া হৈছে সহস্ৰজনে। এইবাৰ চীনে গোপনে গোপনে পূৰ্ব বিতৰ্কিত পূৱ লাডাখত দলং নিৰ্মাণ কৰাৰ বাতৰি পোহৰলৈ আহিছে। শেহতীয়াকৈ, ভাৰতে স্বীকাৰ কৰিছে এই কথা। ভাৰতৰ বৈদেশিক মন্ত্ৰণালয়ে সদৰী কৰে যে, ‘আজিৰ পৰা ৬০ বছৰ আগেয়ে অবৈধভাৱে অধিকৃত স্থানত দলং নিৰ্মাণ কৰি আছে চীনে।’ ভাৰতীয় বৈদেশিক মন্ত্ৰালয়ৰ মুখপাত্ৰ অৰিন্দম বাগছীয়ে কয়, ‘পাংগঙত চীনৰ দলং নিৰ্মাণৰ কাৰ্যৰ ওপৰত চোকা নজৰ ৰাখিছে চৰকাৰে।

ভাৰতে কেতিয়াও চীনৰ দখলদ্বাৰিত্বক স্বীকাৰ কৰা নাই। চৰকাৰে আমাৰ স্বাৰ্থ সুৰক্ষিত কৰিবলৈ সকলোধৰণৰ প্ৰয়োজনীয় ব্যৱস্থা গ্ৰহণ কৰি আছে। এই পদক্ষেপবোৰৰ ভিতৰত আছে সীমান্ত আন্তঃগাঁথনি (পথ আৰু দলং) নিৰ্মাণৰ বাবে পুঁজি সৃষ্টি কৰা আৰু সশস্ত্ৰ বাহিনীৰ বাবে প্ৰয়োজনীয় ৰেচন যোগান ধৰা।’ ইয়াৰ মাজতে ভাৰতীয় সংবাদ মাধ্যমতো প্ৰকাশ পাইছে আন এক শিহৰণকাৰী তথ্য। ভূ-ৰাজনৈতিক বিশেষজ্ঞ আৰু ডিটেকটিভ ডেমিয়েন চাইমনৰ সন্ধানত ওলাই অহা উপগ্ৰহ ছবিৰ বিষয়ে প্ৰতিবেদন প্ৰকাশ পাইছে। বিশেষজ্ঞজনে চীনত দলং নিৰ্মাণৰ কাম চলি থকাৰ বিষয়টো নিশ্চিেত কৰিছে। টুইটাৰত ডেমিয়েন চাইমনে প্ৰকাশ কৰা এখন ছবিত দলংখনৰ নিৰ্মাণৰ কাম প্ৰায় সম্পূৰ্ণ হৈ উঠা দেখিবলৈ পোৱা গৈছে।সকলোৰে অলক্ষিতে চীনে এটা সৰু হ্ৰদৰ কাষত দলং খন নিৰ্মাণ কৰা দেখা গৈছে।