ডিজিটেল ডেস্কঃ দেশত লাভ জিহাদৰ ঘটনা বৃদ্ধি পাই অহা বুলি অভিযোগ উঠাৰ সময়তে মুম্বাইত এক বৃহৎ লাভ জিহাদ বিৰোধী পদযাত্ৰা উলিওৱা হয়৷ প্ৰতিবাদী শোভাযাত্ৰাত ধৰ্মান্তৰকৰণ বিৰোধী আইন আৰু ধৰ্মৰ নামত ভূমি দখলৰ বিৰুদ্ধে চৰকাৰী হস্তক্ষেপৰ দাবী জনোৱা হয়। ৰাষ্ট্ৰীয় স্বয়ংসেৱক সংঘ (আৰ এছ এছ), বজৰং দল আৰু বিশ্ব হিন্দু পৰিষদৰ (ভিএইচপি) দৰে কেইবাটাও হিন্দুত্ববাদী সংগঠনৰ নেতা আৰু কৰ্মীসকলে এই পদযাত্ৰাত যোগদান কৰে।
'অল হিন্দু সমাজ'ৰ দ্বাৰা আয়োজিত শোভাযাত্ৰা মধ্য মুম্বাইৰ দাদৰৰ শিৱাজী উদ্যানৰ পৰা আৰম্ভ হয় । চাৰি কিলোমিটাৰতকৈ অধিক দূৰত্ব অতিক্ৰম কৰি পদযাত্ৰাটো কামগাৰ ময়দানত সমাপ্ত হয়। পদযাত্ৰাত শিৱসেনাৰ কেইবাজনো নেতা আৰু বিধায়কৰ লগতে মহাৰাষ্ট্ৰৰ মুখ্যমন্ত্ৰী একনাথ চিন্দেয়েও অংশগ্ৰহণ কৰে। শোভাযাত্ৰাত ভাগ লোৱাসকলে লাভ জিহাদৰ বিৰুদ্ধে শ্ল'গান দিয়ে। শোভাযাত্ৰাৰ সময়ত যাতে কোনো অপ্ৰীতিকৰ ঘটনা ঘটিব নোৱাৰে তাৰ বাবে পৰ্যাপ্ত আৰক্ষী বাহিনী মোতায়েন কৰা হয় ।
উল্লেখ্য যোৱা কিছু বছৰ মানধৰি হিন্দুত্ববাদী কৰ্মীসকলে বিভিন্ন ৰাজ্যত ধৰ্মান্তৰকৰণ বিৰোধী আইনৰ দাবী কৰি আহিছে। তেওঁলোকৰ মতে, মুছলমান যুৱকসকলে হিন্দু যুৱতীক মুখ্যতঃ ধৰ্মান্তৰিত কৰাৰ উদ্দেশ্যে বিয়া কৰায়। তেওঁলোকে এই ঘটনাক 'লাভ জিহাদ' বুলি কৈ আহিছে। যোৱা মাহত মহাৰাষ্ট্ৰৰ উপ মুখ্যমন্ত্ৰী দেৱেন্দ্ৰ ফাডনাভিছে কৈছিল যে মহাৰাষ্ট্ৰ চৰকাৰে এই সম্পৰ্কীয় আন ৰাজ্যৰ আইন পৰীক্ষা কৰি আছে। হয়তো ৰাজ্য খনতো শীঘ্ৰে তেনে এখন আইন হ’ব৷
হিন্দুত্ববাদী কৰ্মীসকলে ইতিমধ্যে দিল্লীত শ্ৰদ্ধা ৱালকাৰৰ হত্যাক 'লাভ জিহাদ' বুলি ঘোষণা কৰিছে। মহাৰাষ্ট্ৰৰ নেতা আৰু মন্ত্ৰীসকলৰও এই বিষয়ত একে ধৰণৰ মতামত প্ৰকাশ কৰি আহিছে।
Continue Reading
