জুবিন গাৰ্গৰ শেষকৃত্য ক’ত কৰা হ’ব? দিয়া হ’ব নে চৰকাৰী বন্ধ? কি ক’লে মুখ্যমন্ত্ৰীয়ে?

ডিজিটেল ডেস্কঃ অসম আজি বাকৰুদ্ধ, অসম আজি স্তব্ধ। এটা সোণালী যুগৰ হঠাতে পৰিসমাপ্তি ঘটিল। ছিংগাপুৰৰ পৰা শুকুৰবাৰে আহিলে অতি দুখৰ খবৰটো। অসমবাসীক দুখৰ সাগৰত পেলাই অজান দেশলৈ গ’লগৈ হিয়াৰ আমঠু জুবিন গাৰ্গ। সকলোৰে ঘৰত দুখৰ বন্যা। টোপনি নাই অধিকাংশৰে চকুত। নিশা জুবিন গাৰ্গৰ কাহিলীপাৰাৰ বাসগৃহত উপস্থিত হয় মুখ্যমন্ত্ৰী ডঃ হিমন্ত বিশ্ব শর্মা।

মুখ্যমন্ত্ৰীয়ে কয় যে ‘‘শনিবাৰে পুৱাৰ ভাগত সম্পন্ন হ’ব মৰণোত্তৰ পৰীক্ষা। শনিবাৰে বিয়লিহে জুবিনৰ নশ্বৰদেহ আহি পোৱাৰ সম্ভাৱনা। সৰুসজাইত এদিনৰ বাবে ৰখা হ’ব জুবিনৰ নশ্বৰদেহ। ৰাইজৰ ৰাজহুৱা শ্ৰদ্ধাঞ্জলিৰ বাবে ৰখা হ’ব জুবিনৰ নশ্বৰদেহ। সৰুসজাইত প্ৰয়োজনত দুদিনৰ বাবেও ৰখা হ’ব পাৰে নশ্বৰদেহ।’’

মুখ্যমন্ত্ৰী হিমন্ত বিশ্ব শৰ্মাই কয় যে কাহিলীপাৰাৰ ঘৰলৈ অনা হ’ব জুবিনৰ নশ্বৰদেহ। কাহিলীপাৰাত কেৱল পৰিয়ালৰ লোকেহে শ্ৰদ্ধাঞ্জলি জনাব পাৰিব। 

শেষকৃত্যৰ স্থান পৰিয়ালৰে আলোচনা কৰি সিদ্ধান্ত লোৱা হ’ব বুলি জনোৱাৰ লগতে শেষকৃত্যৰ দিনা চৰকাৰী বন্ধ ঘোষণা কৰা হ’ব বুলিও জনায় মুখ্যমন্ত্ৰীগৰাকীয়ে।

সমাধিক্ষেত্ৰৰ কথা উল্লেখ কৰি মুখ্যমন্ত্ৰীয়ে কয় যে ‘‘যোৰহাটবাসীয়ে যোৰহাটত সমাধিক্ষেত্ৰ হোৱাটো বিচাৰিছে। সৎকাৰ আৰু সমাধিক্ষেত্ৰৰ কথা পৃথকে আলোচনা কৰিম।’’