ডিজিটেল ডেস্কঃ ‘টাইটানিক’ৰ তাৰকা লিওনাৰ্ডো ডিকেপ্ৰিঅ’ৰ প্ৰেম জীৱনক লৈ কেইবাদিনো ধৰি গুজৱৰ সৃষ্টি হৈছে। তাৰকাগৰাকীৰ স’তে সাঙোৰ খাইছে ভাৰতীয় মূলৰ ব্ৰিটিছ মডেল নীলম গিলৰ নাম। কেইবামাহো ধৰি বিভিন্ন ঠাইত একেলগে দেখা পোৱা গৈছে তেওঁলোকক।
কান চলচ্চিত্ৰ মহোৎসৱৰ সময়তে এই ঘটনা আৰম্ভ হৈছিল। এই দম্পতীক একেলগে উৎসৱত দেখা পোৱা যায়। ইয়াৰ পিছতে দুয়োৰে সম্পৰ্কক লৈ চৰ্চা আৰম্ভ হয়। কেইবামাহো এই জল্পনা-কল্পনা চলি থকাৰ পিছত অৱশেষত নীলমে মুকলিকৈ ক’লে।
কেইমাহমানৰ আগতে ইটালীৰ চাৰ্ডিনিয়াত ব্যক্তিগত ইয়টত দুয়োকে ৰ’দত গা ধুই থকা দেখা গৈছিল। তেতিয়াৰ পৰাই উৰাবাতৰি তীব্ৰতৰ হৈ পৰিছে। এইবাৰ নীলমে নিজৰ ইনষ্টাগ্ৰাম ষ্ট’ৰীত লিঅ’নাৰ্ডোৰ সৈতে সম্পৰ্কৰ গুজৱ ক্লিয়াৰ কৰি কয় যে তেওঁলোক কেৱল বন্ধু।
নীলমে লিখিছে, ‘মই লিওনাৰ্ডো ডিকেপ্ৰিঅ’ৰ নতুন প্ৰেমিকা নহয়। আচলতে তেওঁৰ ঘনিষ্ঠ বন্ধুৰ লগত মোৰ সম্পৰ্ক আছে। বহু মাহ হ'ল। মই মোৰ সংগীৰ সৈতে তাত আছিলো। লিঅ’নাৰ্ডোও তাত আছিল। আশাকৰোঁ এইবাৰ মিছা কাহিনীবোৰ বন্ধ হৈ যাব।”
যোৱা মাহত মানহাটানত আন্তঃৰাষ্ট্ৰীয় মডেল গিগি হাদিদৰ সৈতে ডিনাৰ ডেটলৈ যোৱাৰ সময়ত কেমেৰাত ধৰা পৰিছিল ‘দ্য ডিপাৰ্টেড’ৰ বিখ্যাত অভিনেতাগৰাকী। ইয়াৰ পিছত মাৰ্চ মাহত অনুষ্ঠিত হোৱা অস্কাৰ পাৰ্টিতো তেওঁলোকক দেখা গৈছিল।
