ডিজিটেল ডেস্কঃ দেশৰ ৰাজধানীত একেৰাহে দুটা কাণ্ড (শ্ৰদ্ধা ৱাকাৰ হত্যাকাণ্ড আৰু নিকি যাদৱ হত্যাকাণ্ড) সংঘটিত হোৱাৰ পিছত এতিয়া মহাৰাষ্ট্ৰৰ পালঘৰত সংঘটিত হোৱা এনে এক ঘটনাই দেশক কঁপাই তুলিছে। পালঘৰৰ তুলিঞ্জ অঞ্চলৰ লিন-ইনত বাস কৰা এজন যুৱকে প্ৰেমিকাক হত্যা কৰি বিচনাৰ ভিতৰত মৃতদেহ লুকুৱাই ৰাখিছিল। ঘটনা পোহৰলৈ অহাত আৰক্ষীয়ে অভিযুক্তক গ্ৰেপ্তাৰ কৰে। তথ্য দি আৰক্ষীয়ে কয় যে ঘটনাৰ দিনটোত কোনো এটা বিষয়ক লৈ দুয়োৰে মাজত কাজিয়া হৈছিল, যাৰ বাবে যুৱকজনে প্ৰেমিকাক হত্যা কৰিছিল। সম্প্ৰতি আৰক্ষীয়ে জেৰা অব্যাহত ৰাখিছে।
মৃত মেঘা (৩৭) এখন চিকিৎসালয়ৰ নাৰ্চ আছিল। তথ্য দি গোচৰটোৰ তদন্ত কৰি থকা তুলিঞ্জ থানাৰ এছ এইচ অ’ই জানিবলৈ দিয়ে যে মৃত মেঘা (৩৭) এখন চিকিৎসালয়ৰ নাৰ্ছ আছিল। সোমবাৰে মেঘাৰ ভাড়াঘৰত উদ্ধাৰ হয় মৃতদেহ। ঘৰৰ পৰা দুৰ্গন্ধ অহাৰ পিছত চুবুৰীয়াই আৰক্ষীৰ কণ্ট্ৰল ৰুমত খবৰ দিয়ে।
আৰক্ষীয়ে ঘৰত তালাচী চলাওঁতে মেঘাৰ মৃতদেহ বিচনাৰ বাকচত মেট্ৰেচ এখনৰে মেৰিয়াই থোৱা অৱস্থাত উদ্ধাৰ কৰে। অভিযুক্ত হাৰ্ডিক শ্বাহে জেৰাৰ সময়ত নিজৰ অপৰাধ মানি লৈছে। অভিযুক্তই কয় যে তেওঁ আৰু মেঘাই লিভ-ইনত বাস কৰিছিল যদিও দুয়োৰে মাজত সঘনাই কাজিয়া হৈছিল। সেইদিনাও কাজিয়া কৰি তেওঁ মেঘাক হত্যা কৰি মৃতদেহ বিচনাত লুকুৱাই ৰাখিছিল।
হাৰ্ডিক শ্বাহে আৰক্ষীক জনোৱা মতে, চাকৰিৰ অভাৱৰ বাবে তেওঁ দীৰ্ঘদিন ধৰি নিবনুৱা হৈ আছিল, যাৰ বাবে আগতে দুয়োৰে মাজত কাজিয়া হৈছিল। হাৰ্ডিকে মেঘাৰ হত্যাকাণ্ডৰ বিষয়েও ভগ্নীক অৱগত কৰিছিল। তদন্তত আৰক্ষীয়ে জানিব পাৰে যে অভিযুক্তই মেঘাক ইউএছবি কেবলেৰে ডিঙি চেপি হত্যা কৰিছিল।
উল্লেখ্য যে ইয়াৰ পূৰ্বে দিল্লীৰ মেহৰৌলি অঞ্চলত আফতাব আমিন পুনাৱালা নামৰ এজন যুৱকে নিজৰ লিভ ইন পাৰ্টনাৰ শ্ৰদ্ধা ৱাকাৰক ডিঙি চেপি হত্যা কৰিছিল। হত্যাকাণ্ডৰ পিছত অভিযুক্তই ঘৰৰ ডিপ ফ্ৰীজৰ ভিতৰত ৩৫ টুকুৰা কৰি মৃতদেহ লুকুৱাই ৰাখিছিল। ইয়াৰ পাছত দিল্লীত ১০ ফেব্ৰুৱাৰীত নিকি যাদৱ নামৰ যুৱতীগৰাকীক ডিঙি চেপি হত্যা কৰে লিভ-ইন পাৰ্টনাৰ ছাহিল গেহলটে। এই মৃতদেহ ধাবাৰ এটা ফ্ৰীজত লুকুৱাই ৰাখিছিল ছাহিলে। নিকিৰ মৃতদেহ উদ্ধাৰ হয় ১৪ ফেব্ৰুৱাৰীত।
Continue Reading
