ডিজিটেল ডেস্ক: লোকসভা নিৰ্বাচন চমু চপাৰ লগে লগে ৰাজ্যৰ ৰাজনীতিত সক্ৰিয় হৈ পৰিছে বদৰুদ্দিন আজমল৷ আজমলৰ সক্ৰিয়তাই এতিয়া চিন্তিত কৰি তুলিছে ৰাজ্যখনৰ চিন্তাশীল নাগৰিকক৷ সাম্প্ৰদায়িক কথা-বতৰাৰে অসমীয়া সমাজখনক দ্বিবিভক্ত কৰাৰ অভিপ্ৰায়েৰে আজমলে ৰাজনীতি কৰাৰ অভিযোগ ৰাজ্যৰ সচেতন মহলৰ৷
প্ৰতিটো নিৰ্বাচনৰ পূৰ্বে বদৰুদ্দিন আজমলে বিশেষ উদ্দেশ্য আগত ৰাখি সাম্প্ৰদায়িক মন্তব্যৰে ৰাজ্যৰ ৰাজনীতিত চৰ্চিত হৈ পৰে৷ মূলত: যিকেইটা কাৰণত অসমৰ বিৰোধী ঐক্যমঞ্চই লগত নল’লে আজমলক, তাৰ অন্যতম অভিযোগ আছিল যে আজমল বিজেপিৰ বি-টীম৷ আৰু সেই অভিযোগৰেই সত্যতা প্ৰতিপন্ন কৰি আজমলে বিজেপিৰ সহায় হোৱাকৈ ৰাজনীতি কৰাৰ অভিযোগ এতিয়া অসমৰ আকাশে-বতাহে৷
নিৰ্বাচনৰ পূৰ্বে চৰকাৰৰ বিফলতাক লৈ ৰাজ্যৰ জনসাধাৰণে প্ৰশ্ন তুলিবলৈ আৰম্ভ কৰাৰ সময়তে প্ৰেক্ষাপটত হঠাতে আবিৰ্ভাৱ হৈছে বদৰুদ্দিন আজমলৰ৷ মৌলিক চিন্তা আৰু জাতীয় জীৱনৰে জড়িত প্ৰশ্নসমূহৰ পৰা জনদৃষ্টি আঁতৰাই ৰাখিবলৈ বদৰুদ্দিন আজমলক ব্যৱহাৰ কৰিছে এটা মহলে৷
আৰু উগ্ৰ সাম্প্ৰদায়িক মন্তব্যৰে ধৰ্মীয় মেৰুকৰণ সৃষ্টি কৰি ভোটবেংকৰ ৰাজনীতি কৰিছে সেই মহলটোৱে৷ আজমলৰ মন্তব্যৰে হিন্দুমূলীয় ভোট একত্ৰিত কৰাৰো কৌশল অৱলম্বন কৰিছে সেই বিশেষ মহলটোৱে৷ অৱশ্যে, সম্প্ৰতি সেই পুৰণি কৌশলে যেন কাম দিয়া নাই৷
আজমলক সন্মুখত ৰাখি ধৰ্মীয় মেৰুকৰুণৰ ৰাজনীতিৰ আখৰা এইবেলি কোনোবাখিনিত ৰৈ গৈছে৷ আজমলৰ মন্তব্য আৰু সেই মন্তব্যক উভতি ধৰি বিজেপিৰ নেতা-পালিনেতাই কৰা প্ৰতিক্ৰিয়াসমূহে এইবেলি প্ৰভাৱ বিস্তাৰ কৰিবলৈ সক্ষম হোৱা নাই৷
আজমলৰ সাম্প্ৰদায়িক মন্তব্যৰ বিৰুদ্ধে গোচৰ ৰুজু হ’লেও চৰকাৰে নলয় কোনোধৰণৰ ব্যৱস্থা৷ অথচ, চৰকাৰৰ প্ৰতিনিধিয়ে মুখ চুপতিত ব্যস্ত থাকে আজমলৰ সৈতে৷ আৰু কথাৰ কটাকটিত গৌণ হৈ পৰি ৰয় সেইবোৰ বিষয়, যিবোৰ বিষয় অসমৰ জাতীয় জীৱনৰ সৈতে জড়িত৷ অসম চুক্তি ৰূপায়ণ, ৬ জনগোষ্ঠীৰ জনজাতিকৰণৰ দৰে অসমীয়া জাতিৰ ভৱিষ্যতৰ ৰূপৰেখা প্ৰস্তুত কৰিব পৰা বিষয়সমূহ নীৰৱে শুই পৰে আজমল-বিতৰ্কৰ আঁৰে-আঁৰে৷
Continue Reading
