ডিজিটেল ডেস্ক: দেশত ৰাজনৈতিক নেতাই মাছখোৱাক লৈও আৰম্ভ হ’ল কুটিল ৰাজনীতি। আৰজেডি নেতা তেজস্বী যাদৱে মাছ খোৱাক কেন্দ্ৰ কৰি উত্তাল বিহাৰৰ ৰাজনীতি। লোকসভা নিৰ্বাচনৰ পূৰ্বে দেশত এতিয়া তীব্ৰ ৰূপত বলিছে ৰাজনীতিৰ বতাহ। তাৰ মাজতে অব্যাহত আছে ৰাজনৈতিক নেতাৰ মাজত বাকযুদ্ধ। গুৰুত্ব পাব নলগীয়া বিষয়ো এতিয়া হৈ পৰিছে ৰাজনৈতিক বিতৰ্কৰ অভিকেন্দ্ৰ। নৱৰাত্ৰিৰ মাজতেই তেজস্বী যাদৱে মাছ খোৱাক লৈ ব্যাপক প্ৰতিক্ৰিয়াৰ সৃষ্টি হৈছে বিহাৰৰ ৰাজনীতিত।
আৰজেডি নেতাগৰাকীয়ে প্ৰচাৰৰ মাজতেই সোমবাৰে ছ’চিয়েল মিডিয়াত পোষ্ট কৰিছিল এটা ভিডিঅ’। নিৰ্বাচনী প্ৰচাৰৰ ব্যস্ততাৰ মাজতেই হেলিকপ্টাৰত মাছৰ সৈতে খাদ্য গ্ৰহণ কৰিছিল তেজস্বী যাদৱে। যোৱা ৮ এপ্ৰিলত সামাজিক সেই ভিডিঅ’টো পোষ্ট কৰিছিল নেতাগৰাকীয়ে। নেতাগৰাকীৰ সেই ভিডিঅ’ক অস্ত্ৰ হিচাপে লৈ ৰাজ্যখনত বিজেপিয়ে আৰম্ভ কৰিছে কুটিল ৰাজনীতি। বিজেপিৰ শীৰ্ষ নেতৃত্বই সেই ভিডিঅ’ ছ’চিয়েল মিডিয়াত শ্বেয়াৰ কৰি তেজস্বী যাদৱক আখ্যা দিছে ঋতুভিত্তিক সনাতনী হিচাপে। নৱৰাত্ৰিত আমিষ ভোজন কৰাৰ বাবে তেজস্বী যাদৱক হিন্দুবিৰোধী আখ্যা দিছে বিজেপিয়ে। প্ৰতিক্ৰিয়া প্ৰকাশ কৰিছে গিৰিৰাজ সিঙৰ দৰে জ্যেষ্ঠ বিজেপি নেতাই।
বিহাৰৰ উপ–মুখ্যমন্ত্ৰীয়ে যাদৱৰ এনে কাৰ্যক তুষ্টিকৰণৰ ৰাজনীতি আখ্যা দিছে। আমিষ ভোজন কৰাক লৈ বিৰ্তকৰ সূচনা হোৱাৰ পাছত বিজেপিক উভতি ধৰিছে আৰজেডি নেতাগৰাকীয়ে। এয়া বিজেপিক লৈ কৰা এক IQ টেষ্ট আছিল , য’ত চূড়ান্তভাৱে বিফল হ’ল দলটো। ছ’চিয়েল মিডিয়া পোষ্টটোত তেওঁ স্পষ্টকৈ উল্লেখ কৰিছিল ৮ এপ্ৰিল দিনটো। ৯ এপ্ৰিলৰ পৰাহে আৰম্ভ হৈছে নৱৰাত্ৰি। কিন্তু বিজেপিয়ে যে নিবনুৱা, মূল্যবৃদ্ধি আদি প্ৰসংগ তল পেলাবলৈ এনে নিকৃষ্ট ৰাজনীতিৰ আশ্ৰয় ল’ব তাৰেই IQ টেষ্ট আছিল এয়া। বিজেপিৰ সমালোচনাক প্ৰত্যুত্তৰ দি এই মন্তব্য আৰজেডি নেতাগৰাকীৰ। এনেদৰেই এতিয়া মাছ খোৱাক লৈও উত্তাল হৈছে এখন ৰাজ্যৰ ৰাজনীতি।
Continue Reading
