ডিজিটেল ডেস্ক: বিপদে লগ নেৰা হৈছে দেশৰ বিমান পৰিবহন ব্যৱস্থা। শেহতীয়া কেইটামান দিনত যাত্ৰাপথত দেখা দিয়া কাৰিকৰী বিজুতিৰ ফলত যাত্ৰাপথ সলনি কৰি অন্য কোনো পৃথক বিমানবন্দৰত অৱতৰণ কৰিবলৈ বাধ্য হৈছে দেশৰ কেইবাখনো বিমানে। শুকুৰবাৰে পুনৰ এনে এক পৰিস্থিতিৰ সন্মুখীন হৈছে গ’ ফাৰ্ষ্ট কোম্পানীৰ এখন বিমান। বেংগালুৰুৰ পৰা মালদ্বীপৰ মালে অভিমুখী গ’ ফাৰ্ষ্ট- ৰ বিমান খনত ভুলবশত: সতৰ্কতামূলক এলাৰ্ম বাজি উঠাৰ বাবে কইম্বাটুৰত জৰুৰী অৱতৰণ কৰে।
প্ৰায় ৯২ গৰাকী যাত্ৰীক কঢ়িয়াই নিয়া বিমানখনৰ পাইলটগৰাকীয়ে তামিলনাডুৰ কইম্বাটুৰৰ ওচৰতে সতৰ্কতামূলক এলাৰ্ম বাজি উঠাৰ বাবে যাত্ৰা পথ সলনি কৰি কইম্বাটুৰ বিমানবন্দৰত লগে লগে অৱতৰণ কৰায়। অৱশ্যে কইম্বাটুৰৰ বিমানবন্দৰ কৰ্তৃপক্ষই বিমানখন পৰীক্ষা কৰাৰ পিছত এই এলাৰ্মভুলতে বজা বুলি নিশ্চিত হয়।
বিমানবন্দৰ কৰ্তৃপক্ষই জানিবলৈ দিয়া মতে দুটা ইঞ্জিন অত্যাধিক গৰম হৈ যোৱাৰ পিছতে বিমানখনত এলাৰ্ম বাজি উঠিছিল। বিশেষজ্ঞ দলৰ দ্বাৰা ইঞ্জিনৰ পৰীক্ষা কৰাৰ পিছত ভুলৱশত: এলাৰ্ম বাজি উঠা বুলি নিশ্চিত হয় আৰু বিমানখনৰ উৰণৰ ক্ষেত্ৰত কোনো বাধা নাই বুলি ঘোষণা কৰে। পৰীক্ষণ প্ৰক্ৰিয়া সম্পূৰ্ণ হোৱাৰ পিছত বিমানখন সন্ধিয়া ৫ বজাৰ পিছত মালেলৈ পুনৰ ৰাওনা হয়।
উল্লেখ্য যে বিগত সময়চোৱাত বিমান পৰিবহনৰ ক্ষেত্ৰত সমুখলৈ অহা একাধিক কাৰিকৰী বিজুতিৰ ঘটনাৰ পাছত মন্ত্ৰী জ্যোতিৰাদিত্য সিন্ধিয়াই ভাৰতীয় বিমান কেৰিয়াৰ সমূহৰ মুৰব্বীসকলৰ সৈতে বৈঠক আহ্বান কৰিছিল। সিন্ধিয়াই লগতে প্ৰতিটো বিমান সংস্থাক সুৰক্ষা পৰ্যৱেক্ষণ বৃদ্ধি কৰাৰ বাবে প্ৰয়োজনীয় সকলো পদক্ষেপ ল'বলৈ নিৰ্দেশ দিছিল।
Continue Reading
