মাৰ্ঘেৰিটাত বেংক মিত্ৰৰ জৰিয়তে ভয়ংকৰ জালিয়াতি! লাখে লাখে টকা আত্মসাৎ মিনতি বৰুৱাৰ

ডিজিটেল ডেস্কঃ  মাৰ্ঘেৰিটাত বেংক মিত্ৰৰ জৰিয়তে ভয়ংকৰ জালিয়াতি।  ঋণ লোৱা ব্যক্তিৰ মনোনীত পাঁচ যুৱকক প্ৰৱঞ্চনা ৷

তিনিচুকীয়া জিলাৰ ৮৩ নং মাৰ্ঘেৰিটা সমষ্টিৰ অন্তৰ্গত বিভিন্ন বেংকৰ জৰিয়তে এজেণ্টসকলে দৰিদ্ৰ যুৱকৰ নামত ঋণ আত্মসাতৰ ঘটনা পোহৰলৈ আহিছে।

জানিব পৰা মতে মাৰ্ঘেৰিটাৰ মাকুমকিল্লাৰ মিনতি বৰুৱা নামৰ এগৰাকী মহিলাই সাধাৰণ গাঁৱলীয়া যুৱকৰ সতে পাহাৰসদৃশ ভয়ংকৰ জালিয়াতি কৰাৰ অভিযোগ পাঁচ যুৱকৰ।

মিনতি বৰুৱা নামৰ ধৃত মাকুমকিল্লাৰ মহিলাগৰাকীয়ে পুৰ্বেও দুটাকৈ বেংকৰ জৰিয়তে জনতাৰ ঋণ উলিয়াই আত্মসাৎ কৰাৰ উদাহৰণ আছে ।

কিছুদিনপুৰ্বে মিনতি বৰুৱাই মাৰ্ঘেৰিটাৰ চেগুনবাৰীস্থিত 'অসম গ্ৰামীণ বিকাশ বেংক'ৰ বেংক মিত্ৰ উপাধি লৈ কেইজনমান যুৱকক ঋণ উলিয়াই দিছিল ।

আনহাতে তেওঁলোকৰ নমিনি হোৱা অৰ্থাৎ মনোনীত যুৱক পাঁচজনৰ স্বাক্ষৰ কৰোৱা ফৰ্মৰ জৰিয়তে মিনতি বৰুৱাই ঋণ উলিয়াই বিলাসী জীৱন যাপন কৰি আহিছিল।

অৱশেষত গ্ৰামীণ বিকাশ বেংকে ঋণ পৰিশোধ নকৰা বুলি পাঁচজনকৈ যুৱকৰ নামত জাননী প্ৰেৰণ কৰাত উলায় উৰহী গছৰ ওৰ।

অৱশেষত ন্যায় বিছাৰি মাকুমকিল্লাৰ পাঁচ যুৱকে আজি মাৰ্ঘেৰিটাৰ আৰক্ষী থানাত মিনতি বৰুৱাৰ বিৰুদ্ধে এজাহাৰ দাখিল কৰে ৷

এনে জালিয়াতি কৰা মিনতি বৰুৱাৰ বিৰুদ্ধে এতিয়া আইনে কি ব্যৱস্থা গ্ৰহণ কৰে সেয়াই হ'ব লক্ষ্যণীয়।

তদুপৰি মাৰ্ঘেৰিটাৰ সচেতন মহলে এই ঘটনাত গ্ৰামীণ বিকাশ বেংকৰ কৰ্তৃপক্ষ জড়িত থকাৰ সন্দেহ প্ৰকাশ কৰি আইনৰ আওঁতালৈ বেংক কৰ্তৃপক্ষকো আনিবলৈ দাবী জনায় ৰাইজে ।