ডিজিটেল ডেস্ক : সুৰাৰ বিৰুদ্ধে কঠোৰ প্ৰশাসন। সুৰাৰ ব্যৱহাৰ কোনোপ্ৰকাৰে নচলিব। পিছে তালাচীৰ নামত সকলো সীমা চেৰাই গ'ল আৰক্ষী! মদৰ বটল বিচাৰি এগৰাকী ন-কইনাৰ কোঠালীত সোমাই লণ্ড-ভণ্ড কৰিলে সকলো। আৰক্ষীৰ এনে আচৰণত হতবাক সকলো।
ঘটনা বিহাৰৰ। বিহাৰৰ মুখ্যমন্ত্ৰী নীতিশ কুমাৰে মহিলাসকলৰ দাবীৰ প্ৰতি সঁহাৰি জনাই ২০১৬ চনতেই ৰাজ্যখনত সুৰা নিবাৰণ কৰাৰ কথা ঘোষণা কৰিছিল। কিন্তু তাৰ পাছতো ৰাজ্যখনৰ আৰক্ষীয়ে সুৰাৰ বিৰুদ্ধে অভিযান চলাই ন-কইনাৰ কোঠালী পাইছেগৈ। হাজিপুৰ চহৰৰ হঠছৰগঞ্জ অঞ্চলৰ শীলা দেৱী নামৰ এগৰাকী মহিলাৰ ঘৰত বৈশালী জিলা আৰক্ষীৰ লোকে বৃহস্পতিবাৰে নিশা এক অভিযান চলায়। তালাচীৰ নামত আৰক্ষীৰ দলটোৱে ঘৰখনৰ সদ্য বিবাহিতা বোৱাৰীৰ কোঠালৈ সোমাই গৈ লণ্ডভণ্ড কৰে। কোনো মহিলা আৰক্ষী অবিহনে যোৱা দলটো প্ৰৱেশ কৰা অৱস্থাত পূজা কুমাৰী নামৰ ন-কইনাজনী অকলে আছিল। আৰক্ষীৰ দলটোৱে বিছনা, ছ্যুটকেছ আদি সকলোতে বিচাৰ-খোচাৰ চলায়। কি বিচাৰিছে বুলি সোধাত আৰক্ষীয়ে তেওঁক মনে মনে থাকিবলৈ ধমক দিয়ে বুলি পূজাই কয়। তাৰ পাছত তেওঁলোকে কোঠালীটোত থকা মদৰ বটলৰ সন্ধান কৰা বুলি কয়।
আৰক্ষীৰ নাভুত-নাশ্ৰুত কাণ্ড দেখি ইতিমধ্যে বোৱাৰীগৰাকীৰ শাহুৱেক মূৰ্ছা যায়। আশ্চৰ্যজনকভাৱে মহিলাগৰাকী মূৰ্ছা যোৱাৰ পাছতো আৰক্ষী থমকি ৰোৱা নাছিল। তদন্ত প্ৰক্ৰিয়া শেষ হোৱাৰ পাছত পৰিয়ালটো সমাজৰ আগত এক লজ্জাজনক পৰিস্থিতিৰ সন্মুখীন হ'বলগীয়া হয়। কিয়নো তেওঁলোকৰ পৰিয়ালৰ কোনোৱে সুৰাপান কৰাৰ নজিৰ নাই বুলি শীলা দেৱীয়ে জনায়।
লক্ষ্যণীয়ভাবে ঘটনা সন্দৰ্ভত আৰক্ষীৰ লোকে কোনো মন্তব্য দিয়াৰ পৰা বিৰত থাকে। উল্লেখ্য যে, ইয়াৰ পূৰ্বেও সুৰাৰ সন্ধানত বিহাৰ আৰক্ষীয়ে পাটনাৰ এগৰাকী কইনাৰ কোঠালীত প্ৰৱেশ কৰিছিল। এতিয়া প্ৰশ্ন উঠিছে নীতিশ কুমাৰে সুৰা নিবাৰণৰ দাবী কৰা বিহাৰত সঁচাকৈয়ে সুৰা নিবাৰণ হৈছেনে? সুৰা নিবাৰণৰ নামত আৰক্ষীৰ এই আচৰণেই বা কিমান গ্ৰহণযোগ্য?
