ডিজিটেল ডেস্কঃ চৰকাৰী বিভাগৰ গাফিলতিৰ বহু কাহিনী আমি শুনিছোঁ৷শেহতীয়াকৈ উত্তৰ প্ৰদেশৰ কানপুৰৰ বিকাশ ভৱনত সংঘটিত অনুৰূপ ঘটনা পোহৰলৈ আহিছে। য'ত এজন কৰ্মচাৰীৰ কু-কৰ্মৰ বাবে বৃহৎ সংখ্যক চৰকাৰী ফাইল জাৱৰ হৈ পৰিল, সেইটোও কেৱল কৰ্মচাৰীজনে মদ খাবলৈ টকা নথকাৰ বাবেই। বিষয়টো লোকচক্ষুলৈ অহাৰ পাছত চিডিঅ’ই তাৎক্ষণিক ব্যৱস্থা গ্ৰহণ কৰি অভিযুক্ত ছুইপাৰৰ বিৰুদ্ধে গোচৰ ৰুজু কৰে।
বিষয়টো পোহৰলৈ আহে যেতিয়া বিভাগটোৰ এজন কৰ্মচাৰীয়ে মোহন নামৰ এজন ছুইপাৰে বস্তাত কেইবাটাও ফাইল ভৰাই থকা দেখি সন্দেহ ব্যক্ত কৰে। বস্তাটোত চোৱাৰ পাছত যেতিয়া কৰ্মচাৰীজনৰ পৰা তথ্য লোৱা হ’ল, তেতিয়া গম পোৱা গ’ল যে তেওঁ সেই চৰকাৰী ফাইলবোৰ মদ খাবলৈ স্ক্ৰেপ হিচাপে বিক্ৰী কৰিবলৈ ওলাইছে আৰু ইয়াৰ আগতেও ছুইপাৰজনে এই কাণ্ড সংঘটিত কৰিছিল।
ইয়াৰ পাছতো পোহৰলৈ আহিল যে সমাজ কল্যাণ বিভাগৰ কম্পিউটাৰ ৰুমত দীৰ্ঘদিন ধৰি বৃদ্ধ পেঞ্চনৰ আৱেদনৰ বাণ্ডিল ফাইল পোৱা নাছিল। ইয়াৰ পৰৱৰ্তী সময়ত বিভাগীয় বিষয়াসকলে ছুইপাৰজনক লৈ গ’ল এখন জাংক শ্বপলৈ য’ত তেওঁ আগতেও ফাইল বিক্ৰী কৰিছিল। য’ৰ পৰা বিভাগটোৰ বহু ফাইল আৰু ইয়াৰ বাণ্ডিল পোৱা গৈছিল, যিবোৰ পুনৰ বিভাগটোলৈ অনা হৈছিল। আৰু এই কথাটো উন্মোচিত হোৱা দেখি ছুইপাৰ মোহনে সেই ঠাইৰ পৰা পলায়ন কৰে।
বৰ্তমান CDO সুধীৰ কুমাৰে এই সমগ্ৰ বিষয়টো গুৰুত্বসহকাৰে লৈ অভিযুক্ত ছুইপাৰৰ বিৰুদ্ধে গোচৰ ৰুজু কৰি কামৰ পৰা আঁতৰাই দিছে, ইয়াৰ লগতে গাফিলতিৰ বাবে সংশ্লিষ্ট বিভাগৰ পৰাও স্পষ্টীকৰণ বিচৰা হৈছে। ছুইপাৰৰ এনে কাৰ্যৰ খবৰ পাই আন কৰ্মচাৰীৰ লগতে বিষয়াসকলৰ মাজত আলোড়নৰ সৃষ্টি হয়।ইতিমধ্যে প্ৰায়বোৰ বিভাগে নিজৰ পুৰণি ফাইল পৰীক্ষা কৰিবলৈ আৰম্ভ কৰিছে।
Continue Reading
