ডিজিটেল ডেস্কঃ দেশত এতিয়া যেন ক’তোৱেই সুৰক্ষিত নহয় সাধাৰণ জনতা। চলন্ত ৰে’লতে সংঘটিত এক লোমহৰ্ষক ডকাইতিৰ ঘটনাই জোকাৰি গৈছে সমগ্ৰ দেশকে । ঝাৰখণ্ডৰ লাতেহাৰত ডকাইতৰ এটা দলে জম্মু তাৱী অভিমুখী মুৰি এক্সপ্ৰেছ ৰে’লত শনিবাৰে নিশা লুটপাত চলায়।
ৰে'লসুৰক্ষা কৰ্মী আৰু যাত্ৰীসকলক আচৰিত কৰি ডকাইতৰ দলটোৱে ৮-১০ ৰাউণ্ড গুলীচালনাও কৰে। ডকাইতৰ দলটোৱে যাত্ৰীসকলক আনকি মাৰপিট কৰাৰো খবৰ আহিছে। ফলস্বৰূপে কেইবাজনো যাত্ৰী আহত হয়। ৰে'ল আৰক্ষীয়ে ঘটনাটোৰ তদন্ত কৰি আছে যদিও অপৰাধীক ধৰিবলৈ সক্ষম হোৱা নাই।
জানিব পৰা মতে শনিবাৰে নিশা ১২ ৰ পৰা ১৫ জনীয়া ডকাইতৰ এটা দল ৰে’লখনত উঠিছিল। যেতিয়া ৰে’লখন লাতেহাৰ এৰিছিল আৰু বৰৱাড়ী তথা চিপাদোহাৰ ষ্টেচনৰ মাজত আছিল সেই সময়তে দুৰ্বৃত্তৰ দলটোৱে লুণ্ঠন আৰম্ভ কৰিছিল। ডকাইতিৰ ঘটনাটো নিশা ১২ বজাৰ পৰা ১ বজাৰ ভিতৰত সংঘটিত হৈছিল। ৰে’ল খনৰ এছ ৮ কম্পাৰ্টমেণ্টত বন্দুক দেখুৱাই ডকাইতৰ দলটোৱে যাত্ৰীসকলে অবাধে লুণ্ঠন আৰম্ভ কৰিছিল। দলটোৱে যাত্ৰীসকলৰ পৰা নগদ ধন আৰু গহনা কাঢ়ি নিয়ে। এই কাৰ্যত বাধা দিয়া যাত্ৰীসকলক ডকাইতে প্ৰহাৰ কৰে।
ডকাইতৰ দলটোৱে মহিলাসকলৰ সৈতে অশালীন আচৰণ কৰাৰ অভিযোগ উত্থাপিত হৈছে। লুণ্ঠন চলোৱাৰ পিছত মাজবাটতে চকাইতৰ দলটোৱে চেইন টানি ৰে’লখন ৰখায় আৰু ৰে’লৰ পৰা নামি যায়। ঘটনাৰ পিছতে আহত যাত্ৰীসকলক উদ্ধাৰ কৰি এখন চিকিৎসালয়ত ভৰ্তি কৰোৱা হয়। ৰে’লখন আহি ডাল্টনগঞ্জত ৰোৱাৰ পিছতে যাত্ৰীসকলে ৰে’ল আৰক্ষীৰ ওচৰত অভিযোগ দাখিল কৰে। ঘটনাটোৰ তদন্ত আৰম্ভ হৈছে যদিও কাকো ধৰিব পৰা নাই। যাত্ৰীসকলৰ মতে চকাইতৰ দলটোৱে নগদ ধন আৰু গহনাকে ধৰি কেইবা লাখ টকা লুটি লৈ পলাই যায়।
Continue Reading
