মহিলা সাংবাদিকক নিৰ্যাতন চলাই গ্ৰেপ্তাৰ কেব চালক

ডিজিটেল ডেস্কঃ এগৰাকী মহিলা সাংবাদিকক এজন কেব চালকে চলালে নিৰ্যাতন। সাংবাদিকগৰাকীৰ লগতে তেওঁৰ বান্ধৱীকো নিৰ্যাতন চলালে চালকজনে। এই ঘটনা সংঘটিত হৈছে পশ্চিমবংগৰ কলকাতাৰ চল্টলেক অঞ্চলত। ঘটনাটোক কেন্দ্ৰ কৰি সমগ্ৰ অঞ্চলজুৰি তীব্ৰ প্ৰতিক্ৰিয়াৰ সৃষ্টি হৈছে। অভিযোগ অনুসৰি, কেব চালকজনে সকলো যান-বাহনৰ নিয়ম ভংগ কৰি অতি তীব্ৰ গতিত গাড়ী চলাই গৈছিল। ইয়াৰ ফলত কথমপি দুৰ্ঘটনা হোৱাৰ পৰা ৰক্ষা পৰিছিল মহিলা সাংবাদিকগৰাকী। কাৰ্যালয়ৰ পৰা ঘৰলৈ আহি থকা সাংবাদিকগৰাকীয়ে তেওঁ নিজৰ স্কুটি ৰখাই চালকজনক এই সম্পৰ্কে সতৰ্ক কৰি দিছিল।

মহিলা সাংবাদিকগৰাকীৰ এই কথাত খৰ্গহস্ত হৈ পৰা কেব চালকজনে সাংবাদিকগৰাকীক নিৰ্যাতন চলায়। চালকজনে মহিলা সাংবাদিক গৰাকীক নিৰ্যাতন চলায়ে ক্ষান্ত নাথাকি তেওঁৰ লগত অহা বান্ধৱীজনীকো নিৰ্যাতন চলায়। এই ঘটনাৰ পাছতে মহিলা সাংবাদিকগৰাকীয়ে আৰক্ষী থানাত ঘটনা সংক্ৰান্তত এক অভিযোগ দাখিল কৰে। তেওঁৰ অভিযোগৰ ভিত্তিত আৰক্ষীয়ে চালকজনক গ্ৰেপ্তাৰ কৰি জেৰা অব্যাহত ৰাখিছে।

সাংবাদিকগৰাকীয়ে বাহনখনৰ ফটো প্ৰদান কৰাৰ পিছত চালকজনক গ্ৰেপ্তাৰ কৰিছিল আৰক্ষীয়ে। চালকজনে পলাই যাবলৈ চেষ্টা কৰিছিল কিন্তু অতি ক্ষীপ্ৰতাৰে সাংবাদিকগৰাকীয়ে বাহনখনৰ ফটো তুলি ৰাখে, যাৰ ফলত আৰক্ষীয়ে অতি সহজে কেব চালকজনক জালত পেলাই গ্ৰেপ্তাৰ কৰিবলৈ সক্ষম হয়।