ডিজিটেল ডেস্কঃ খেলি থাকোতেই মূৰত বল লাগি মৃত্যু বৰণ কৰা ভাৰতীয় ক্ৰিকেটাৰ ৰমন লাম্বাৰ কথা হয়তো কোনেও পাহৰা নাই। একেদৰে খেলি থাকোতে মৃত্যুক সাৱটি লোৱা ফিলিপ হিউজৰ কথাও বহুতে মনত ৰাখিছে। এইবাৰ খেল পথাৰতে মৃত্যুক সাৱটিলে ধনেশ ভাজপপ্পীলাথ মাধৱনে।
ওমানৰ মাস্কটত অনুষ্ঠিত এখন এমেচাৰ লীগ খেলত এই কৰুণ ঘটনাটো সংঘটিত হৈছে। মৃত ধনেশ ভাৰতীয় মূলৰ আছিল। তেওঁ তেওঁৰ পত্নী আৰু তিনি বছৰীয়া পুত্ৰক এৰি থৈ গৈছে।
দলৰ অধিনায়ক শ্ৰীজেশে কয় , "ধনেশ শাৰীৰিকভাৱে সুস্থ আছিল। আমাৰ দলৰ শ্ৰেষ্ঠ অলৰাউণ্ডাৰ আছিল তেওঁ। যোৱা দুবছৰ ধৰি তেওঁ দলত খেলিছিল। আমি সাধাৰণতে টেনিছ বলেৰে ১৬ অভাৰৰ মেচ খেলোঁ। তেওঁ বেট আৰু বল দুয়োটাই কৰিছিল। খেলপথাৰত থকা সময়তে তেওঁ হঠাতে জ্ঞান হেৰুৱাই পৰি যায়। মই ভাবিছিলো তেওঁৰ মূৰ ঘূৰোৱা বুলি। তেওঁক ততাতৈয়াকৈ মিছফাৰৰ এখন চিকিৎসালয়লৈ লৈ যোৱা হৈছিল। যিহেতু সেই খন বন্ধ আছিল, মই তেওঁক আন এখন চিকিৎসালয়লৈ লৈ গৈছিলো। কিন্তু চিকিৎসকসকলে তেওঁক মৃত বুলি ঘোষণা কৰে। "
ওমানৰ অপেছাদাৰী লীগত এয়া নতুন ঘটনা নহয়। ইয়াৰ পূৰ্বে মহম্মদ জাফৰ নামৰ এজন ক্ৰিকেটাৰৰ একে ধৰণে মৃত্যু হৈছিল।
Continue Reading
