ডিজিটেল ডেস্কঃ মন্দিৰত প্ৰাৰ্থনা কৰাৰ পিছত উভতি অহাৰ পথতে এখন গাড়ী দুৰ্ঘটনাগ্ৰস্ত হৈ একেটা পৰিয়ালৰ সাতজনৰ মৃত্যু ঘটিছে। মৃতসকলৰ ভিতৰত দুটি শিশু আৰু তিনিগৰাকী মহিলাও আছে। ঘটনাটো ৰাজস্থানৰ চিকাৰ জিলাত সংঘটিত হৈছে। মৃতসকল উত্তৰ প্ৰদেশৰ মিৰাটৰ বাসিন্দা আছিল। তেওঁলোকে ৰাজস্থানৰ ছালাচাৰৰ বালাজী মন্দিৰত প্ৰাৰ্থনা কৰি ঘৰলৈ উভতি আহিছিল।
আৰক্ষীয়ে জনোৱা অনুসৰি, গাড়ীখন ৰাজপথত দ্ৰুত গতিত গৈ আছিল। বাটত এখন ট্ৰাকক অভাৰটেক কৰোঁতে, চালকজনে বিপৰীত দিশৰ পৰা অহা এখন গাড়ী এৰাই চলিবলৈ চেষ্টা কৰিছিল। কিন্তু গাড়ীখনে নিয়ন্ত্ৰণ হেৰুৱাই পেলায় আৰু আন এখন ট্ৰাকৰ সৈতে মুখামুখি সংঘৰ্ষ হয়। গাড়ীখনত লগে লগে জুই লাগে। ফলস্বৰূপে, একেটা পৰিয়ালৰ সাতজন লোক জ্বলি নিঃশেষ হয়।
স্থানীয় লোকসকলৰ মতে, চকুৰ সন্মুখত শোকাৱহ দুৰ্ঘটনাটো দেখি বহু লোকে জুই নুমুৱাবলৈ আগবাঢ়ি আহিছিল। অৱশ্যে, জুইৰ তীব্ৰতা এনে আছিল যে গাড়ীখনৰ ওচৰলৈ কোনেও অগ্ৰসৰ হ'ব পৰা নাছিল। ইফালে, গাড়ীখনৰ দুৱাৰ লাগি ধৰাৰ বাবে যাত্ৰীসকলে ভিতৰৰ পৰা দুৱাৰ খুলিব পৰা নাছিল । তেওঁলোকে গাড়ীৰ ভিতৰৰ পৰা সহায়ৰ বাবে চিঞৰি আছিল। স্থানীয় লোকে সহায় কৰিবলৈ চেষ্টা কৰিছিল কিন্তু কোনেও গাড়ীখনৰ ওচৰলৈ যাব পৰা নাছিল। অগ্নি নিৰ্বাপক বাহিনী ঘটনাস্থলীত উপস্থিত হোৱাৰ আগতেই গাড়ীখনৰ সকলো যাত্ৰী জ্বলি মৃত্যুমুখত পৰে।আৰক্ষীয়ে জনোৱা অনুসৰি, দুৰ্ঘটনাটোৰ পিছত ট্ৰাকৰ চালক আৰু সহায়ক জনে পলাই যায়।
Continue Reading
