মমতাৰ নামত হ'ব লাগে 'খেলৰত্ন' বঁটা,কোনে ক'লে?

পশ্চিমবংগ: 'খেলৰত্ন' বঁটা মমতা বেনাৰ্জীৰ নামত হ'ব লাগে! এইবাৰ জনপ্ৰিয় ইউটিউবাৰ কুনাল কামৰাই সামাজিক মাধ্যমত এই বিভ্ৰান্তিমূলক মন্তব্য কৰিছে। শনিবাৰে 'খেলৰত্ন' বঁটাৰ নাম উল্লেখ নকৰাকৈ কুনালে কয়, 'বিষয়টো মমতা বেনাৰ্জীৰ নামত হ'ব লাগে। কাৰণ তেওঁহে প্ৰকৃত খেলখন খেলিছিল…'।

উল্লেখ্যে যে, শুকুৰবাৰে নৰেন্দ্ৰ মোদী চৰকাৰে ৰাজীৱ গান্ধী 'খেলৰত্ন' বঁটা 'মেজৰ ধ্যান চান্দ খেলৰত্ন বঁটা' হিচাপে পুনৰ নামাকৰণ কৰা হ'ব বুলি প্ৰকাশ কৰিছিল। টুইটাৰযোগে দেশৰ প্ৰধানমন্ত্ৰীয়ে সদৰী কৰে যে, 'দেশৰ নাগৰিকসকলে খেলৰত্ন বঁটা ধ্যান চান্দৰ নামত হোৱাটো বিচাৰিছিল। তেওঁলোকৰ আৱেগক সন্মান জনাই, উক্ত বঁটাটো মেজৰ ধ্যান চান্দ খেলৰত্ন বঁটা হিচাপে পুনৰ নামাকৰণ কৰা হয়'।

শেহতীয়াকৈ ট'কিঅ' অলিম্পিকত ভাৰতৰ পুৰুষ হকী দলে সুদীৰ্ঘ ৪১বছৰ পাছত ব্ৰঞ্জ জয়ৰ সাফল্যৎসৱৰ সময়তে দেশৰ প্ৰধানমন্ত্ৰীয়ে এই গুৰুত্বপূৰ্ণ ঘোষণা কৰিছে। একাংশই চৰকাৰৰ এই সিদ্ধান্তক ভ্ৰূকুটি কৰি আছে যদিও দেশৰ নাগৰিকসকলৰ এটা অংশই হকীৰ প্ৰবাদপুৰুষ ধ্যান চান্দৰ নামত পদকটো উৎসৰ্গা কৰাত অত্যন্ত সুখী হৈছে। পূৰ্বৰ দৰে কুনাল কামৰাই এইবাৰো দেশৰ প্ৰধানমন্ত্ৰীৰ ঘোষণাৰ ওপৰত প্ৰতিক্ৰিয়া ব্যক্ত কৰি স্বাভাৱিকতে মোদীক সমালোচনা কৰিছে। কুনাল কামৰাৰ এই মন্তব্যৰ পাছতে হৈ-চৈ লাগিছে চৌদিশে। সামাজিক মাধ্যমত তেওঁৰ এই মন্তব্যৰ বিৰুদ্ধে সমালোচনা কৰিছে দেশৰ নাগৰিকে|