ডিজিটেল ডেস্ক: সাম্প্ৰদায়িক সংঘৰ্ষৰ ক’লা ছায়া মণিপুৰত৷ গোষ্ঠী সংঘৰ্ষই মণিপুৰৰ শিশুসকলৰ মনত সিঁচি দিলে আতংকৰ বীজ৷ হেৰুৱালে ঘৰ, হেৰুৱালে আপোনজনক৷ আৰু হেৰুৱালে আপোন বিদ্যালয়খন৷ মণিপুৰত সংঘটিত গোষ্ঠীগত সংঘৰ্ষৰ ফলত ১৪,০০০তকৈও অধিক স্কুলীয়া ছাত্ৰ-ছাত্ৰী স্থানচ্যুত হৈছে বুলি বুধবাৰে ৰাজ্যসভাত কেন্দ্ৰীয় চৰকাৰৰ শিক্ষা মন্ত্ৰণালয়ে সদৰী কৰে৷
কেন্দ্ৰীয় শিক্ষা ৰাজ্যমন্ত্ৰী অন্নপূৰ্ণা দেৱীয়ে ৰাজ্যসভাত এক লিখিত উত্তৰত কয় যে মণিপুৰৰ ৯৩ শতাংশতকৈও অধিক শিশুক নিকটতম বিদ্যালয়ত ভৰ্তি কৰোৱা হৈছে।
ৰাজ্যসভাত দেৱীয়ে কয়, মণিপুৰৰ বৰ্তমানৰ পৰিস্থিতিৰ বাবে মুঠ ১৪,৭৬৩গৰাকী স্কুলীয়া শিশু স্থানচ্যুত হৈছে। এইসকল শিক্ষাৰ্থীৰ নামভৰ্তি প্ৰক্ৰিয়াৰ সুবিধাৰ বাবে প্ৰতিটো সাহায্য শিবিৰৰ বাবে এজন নোডেল বিষয়া নিয়োগ কৰা হৈছে৷ মন্ত্ৰীগৰাকীয়ে কয়, প্ৰায় ৯৩.৫ শতাংশ স্থানচ্যুত শিক্ষাৰ্থীক বিনামূলীয়াকৈ নিকটতম বিদ্যালয়ত ভৰ্তি কৰোৱা হৈছে।
মণিপুৰত মেইটিইৰ জনসংখ্যা ৫০ শতাংশতকৈও অধিক, আনহাতে প্ৰায় ৪৩ শতাংশ জনসংখ্যা যুটীয়াভাৱে কুকি, নগা আৰু অন্যান্য জনজাতিৰ।
এই বছৰৰ মে’ মাহত আৰম্ভ হোৱা হিংসাত্মক ঘটনাত ১৫০জনৰো অধিক লোক নিহত আৰু কেইবাজনো আহত হৈছে। মণিপুৰ চৰকাৰৰ প্ৰতিবেদনত কোৱা হৈছে যে ৬০,০০০ৰো অধিক লোকক তেওঁলোকৰ ঘৰৰ পৰা স্থানান্তৰিত কৰা হৈছে। যেতিয়া মণিপুৰৰ কুকিসকলে মেইটেইসকলক চৰকাৰী জনজাতীয় মৰ্যাদা দিয়াৰ দাবীৰ বিৰুদ্ধে প্ৰতিবাদ কৰিবলৈ আৰম্ভ কৰিছিল তেতিয়াই উত্তেজনা ক্ৰমাৎ বৃদ্ধি পাইছিল। প্ৰধানমন্ত্ৰী মোদীয়ে কৈছিল যে কুকি মহিলাৰ ওপৰত হোৱা আক্ৰমণে ভাৰতক লজ্জিত কৰিছে।
মণিপুৰত সংঘটিত হিংসা ৰোধ কৰিবলৈ চৰকাৰে ৰাজ্যখনত ৪০,০০০ নিৰাপত্তাকৰ্মী মোতায়েন কৰিছে।
মুখ্যমন্ত্ৰী এন বীৰেন সিঙৰ নেতৃত্বত ৰাজ্যখনৰ বিজেপি চৰকাৰে কুকি বিদ্ৰোহী গোটবোৰক সম্প্ৰদায়টোক উচটনি দিয়াৰ অভিযোগ উত্থাপন কৰিছে।
Continue Reading
